Troels skrifar um Orra Stein í athyglisverðri grein - Gagnrýnir það hvernig Danirnir brugðust við

Sæki samantekt...

Danski blaðamaðurinn Troels Bager Thogersen gagnrýnir FC Kaupmannahöfn fyrir að bregðast ekki nógu vel við brotthvarfi Orra Steins Óskarssonar síðasta sumar.

Orri Steinn gekk í raðir Real Sociedad á Spáni á lokadegi félagaskiptagluggans síðasta sumar og telur Thogersen að FCK hafi hvorki styrkt sig nógu vel þá né nú í janúarglugganum til að takast á við brotthvarf íslenska markahróksins.

„Að selja Óskarsson rétt fyrir lok félagaskiptagluggans og að fá ekki nógu góða leikmenn í staðinn er að reynast dýrt. Við sjáum hversu dýrt í maí,“ skrifaði Thogersen í Tipsbladet í kjölfar þess að FCK missteig sig á heimavelli gegn Sönderjyske í gær og missti toppsætið til Midtjylland.

„Þeir veðjuðu á Andreas Cornelius og sóknarmenn eins og Armin Chiakha, Viktor Claesson og Jordan Larsson og það gæti kostað þá danska meistaratitilinn.“

Hinn tvítugi Orri Steinn var þegar kominn með fimm mörk í sex leikjum fyrir FCK í upphafi þessa tímabils áður en hann var seldur til Sociedad.