Utanríkis- og varnarmálaráðuneyti til skoðunar

Sæki samantekt...

Utanríkisráðuneytið gæti brátt heitið utanríkis- og varnarmálaráðuneytið.

Þessi breyting er nú til skoðunar innan stjórnarráðsins samkvæmt heimildum mbl.is.

Þorgerður Katrín Gunnarsdóttir utanríkisráðherra sagði í samtali við mbl.is í gær að ekki væri í bígerð að setja á stofn sérstakt ráðuneyti varnarmála.

„Ekki á þessu stigi, en það sem við erum að gera er að við erum að taka þessi skref til að efla varnarmálaskrifstofuna og samþætta þessar stofnanir sem koma að einum eða öðrum hætti að vörnum landsins,“ sagði Þorgerður.

Aukinn þungi

„Það er að gefast vel og við sjáum að það er mikil samvinna og það eru ekki þessi síló á milli þessara sterku stofnana. Þannig við teljum enn sem komið er ekki ástæðu til þess. En þunginn í varnarmálahluta utanríkisráðuneytisins er óneitanlega að aukast.“

Samkvæmt heimildum mbl.is er það þessi þungi sem gerir það að verkum að til skoðunar er samhliða að breyta nafni ráðuneytisins, til að endurspegla aukið vægi varnarmála þar innandyra.