Hluta­bréf taka dýfu við opnun markaða

Sæki samantekt...

Hlutabréf í Bandaríkjunum tóku snarpa dýfu við opnun markaða rétt í þessu, þar sem áhyggjur fjárfesta af efnahagslegri óvissu og stefnu Bandaríkjastjórnar halda áfram að hafa áhrif á markaðinn.

S & P 500 vísitalan féll um tæp 2%, Nasdaq Composite lækkaði nærri 3% og Dow Jones Industrial Average tapaði yfir 300 punktum í fyrstu viðskiptum dagsins.

Stóru tæknifyrirtækin hafa orðið fyrir sérstaklega þungum skellum síðustu daga.

Tesla lækkaði um meira en 8% í viðskiptum í morgun, á meðan tæknirisarnir, þar á meðal Apple, Microsoft, Alphabet og Nvidia, lækkuðu um meira en 2%. Þetta kemur í kjölfar þess að S & P 500 vísitalan tapaði 3,1% í síðustu viku sem er mesta vikulega lækkun hennar í hálft ár.

Óvissa um stefnu Bandaríkjastjórnar hefur ýtt undir óróleikann, en Donald Trump Bandaríkjaforseti sagðist í viðtali við Fox News um helgina ekki útiloka efnahagssamdrátt á þessu ári.

„Það verður tímabil umbreytinga vegna þess að það sem við erum að gera er mjög stórt,“ sagði forsetinn.

Viðskiptaráðherra Bandaríkjanna Howard Lutnick reyndi að draga úr áhyggjum fjárfesta og sagði í viðtali við NBC News að „engin kreppa sé í vændum.“

Viðskiptamenn á Wall Street óttast að ófyrirsjáanleg tollastefna stjórnvalda gæti haft neikvæð áhrif á hagvöxt Bandaríkjanna.

Þegar óvissa eykst leita fjárfestar í öruggari eignir, sem hefur leitt til hækkunar á skuldabréfaverði og lækkunar á ávöxtunarkröfu.

Ávöxtun 10 ára bandarískra ríkisskuldabréfa fór niður fyrir 4,23%, eftir að hafa verið yfir 4,31% í lok síðustu viku.

Bandaríkjadalur hefur einnig veikst og WSJ Dollar Index er við lægsta gildi sitt frá því snemma í nóvember.

Erlendir markaðir hafa einnig brugðist við bandarískum óstöðugleika.

Í Evrópu féll Stoxx Europe 600 vísitalan, þar sem lækkanir í banka- og tæknigeiranum drógu hana niður um 0,6%.

Þýska DAX-vísitalan, sem hafði náð sögulegum hæðum í síðustu viku, lækkaði um meira en 1%.

Fjárfestar eru nú í biðstöðu og fylgjast náið með komandi efnahagsgögnum og yfirlýsingum frá bandarískum stjórnvöldum.

Samkvæmt Financial Times er spurningin nú hvort markaðurinn hafi gengið of langt í viðbrögðum sínum við óvissunni eða hvort þetta sé aðeins byrjunin á dýpri lækkunum.

Í ljósi hratt breytilegs efnahagsumhverfis gætu næstu dagar orðið mikilvægir í að ákvarða hvert hlutabréfamarkaðurinn stefnir á næstunni.