„Fyrrverandi ráðherrar kunna sig ekki, vitið þið ekki hvernig þetta virkar?“

Sæki samantekt...

Guðrún Hafsteinsdóttir, formaður Sjálfstæðisflokksins, lýsti eftir stefnu og aðgerðum stjórnvalda í dag vegna áforma fyrirtækja um uppbyggingu leikskóla. Hún sagði í fyrirspurnatíma á Alþingi að fyrirtækin í landinu fyndu fyrir skorti á leikskólaplássum og vildu bregðast við.

Guðrún sagði að víða um land skorti leikskólapláss og úr því yrði að bæta.

Formaður Sjálfstæðisflokksins sagði að í gær hefði borgarstjórinn í Reykjavík hins vegar lýst því yfir að slíkur leikskólarekstur yrði ekki leyfður. Guðrún sagði afstöðu borgaryfirvalda koma í veg fyrir uppbyggingu nýrra leikskóla þar sem leikskólakennarar gætu fengið greidd betri laun.

„Reykjavík hefur því eitt sveitarfélaga tekið fyrir byggingu fyrirtækjaleikskóla. Frú forseti, meirihlutanum í borginni hugnast einfaldlega ekki lausnir einkaframtaksins.“

Vill ekki tvöfalt kerfi

Ásthildur Lóa Þórsdóttir, mennta- og barnamálaráðherra, var til svara. Hún sagði borgina ekki hafa hafnað fyrirtækjaleikskólum, aðeins sagt að borgin myndi ekki borga með þeim.

Hún sagði að ekki mætti skapast tvöfalt kerfi og að skortur væri á fagmenntuðum leikskólakennurum.

„Það er stærsti vandi leikskólanna í dag, það er skortur á leikskólakennurum. Hvernig ætla einkafyrirtækin að fá leikskólakennara? Þeir ætla að hækka launin þeirra. Er þetta ekki sama fólk og kvartar undan því oft á tíðum að laun kennara séu hækkuð? Er það sanngjarnt að sumir og sum börn fái menntaða leikskólakennara af því að það er fyrirtæki sem er tilbúið að borga fyrir það, bara þessi börn?“

Ásthildur Lóa spurði einnig hvaða áhrif það hefði á leikskólapláss barns ef foreldri þess hætti störfum hjá fyrirtækinu sem ræki leikskólann.

Engin svör við bráðavanda foreldra

Guðrún sagði Ásthildi Lóu í engu hafa svarað fyrirspurn sinni um hvort hún teldi borgarstjórn lagalega stætt á því að hafa fyrirtækjaleikskóla og hvort breyta þyrfti lögum ef svo væri.

Hún sagði ráðherra í engu hafa svarað þessu, aðeins sagt að ekki væri hægt að nota einkaframtakið. Hún spurði hvort ráðherra myndi beita sér fyrir lagabreytingum þannig að fyrirtæki sem vildu leysa bráðavanda foreldra svo þeir gætu sinnt störfum sínum.

Látið reka á reiðanum í mörg ár

Ásthildur Lóa sagði að misskilnings gætti í máli Guðrúnar því leikskólar væru ekki fyrst og fremst fyrir foreldra heldur börn, hafa þyrfti hagsmuni barna í huga. Hún sagði að fjölga þyrfti kennurum eftir að búið væri að láta reka á reiðanum í fjölmörg ár.

Við þetta fóru að heyrast frammíköll úr þingsal og bað Þórunn Sveinbjarnardóttir, forseti Alþingis, þingmenn að spara frammíköllinn.

Ásthildur Lóa brást við frammíköllunum og sagði: „Fyrrverandi ráðherrar kunna sig ekki, vitið þið ekki hvernig þetta virkar?“