Landsbyggðarskattur að vanrækja innviði landsins

Sæki samantekt...

Kristrún Frostadóttir forsætisráðherra andmælti því í Speglinum í kvöld að hækkun veiðigjalda feli í sér skattlagningu á landsbyggðina. Hún sagði að gríðarleg renta hafi skapast í fiskveiðikerfinu en að þjóðin hafi ekki notið afrakstursins.

„Þetta er bara sanngirnismál að hækka veiðigjöld. Þetta er ekki aukaskattlagning. Þetta er hrein renta sem er við að sækja og við ætlum að nota þetta til að styrkja innviði landsins. Það hefur verið rætt um þetta sem landsbyggðarskatt en staðreyndin er sú að það er ekkert annað en landsbyggðarskattur að vanrækja innviði landsins. Það bitnar hvað mest á landsbyggðinni hversu illa er farið með vegakerfið, hversu illa hefur verið farið í uppbyggingu á heilbrigðisþjónustu og almennum innviðum, jarðgöngum og fleira svoleiðis þannig að þarna erum við að mæta þessum innviðaskorti.“

Kristrún sagði skipta máli, frammi fyrir innviðaskuld og brestum í varnarmálum, að horfa til þess hvar sé svigrúm. Hún sagði sjávarútveginn vel ráða við meiri greiðslur og að lengi hafi verið talað um aðgangsstýringu í ferðaþjónustunni.

Rætt hefur verið um að taka upp gjaldtöku í ferðaþjónustu. Kristrún sagði að hægt væri að bjóða upp á fjölnota passa eða skattafrádrætti til að undanskilja Íslendinga gjaldtöku. Lykilmálið væri að hingað kæmu ein til tvær milljónir ferðamanna á ári sem nýttu sér innviði landsins og heilbrigðiskerfið. Hún sagði að meðan ferðamennirnir væru ekki rukkaðir lenti kostnaðurinn á landsmönnum.

„Það hefur verið varðstaða um ákveðnar atvinnugreinar í áratugi hérna en það vill þannig til að nú er komin ný ríkisstjórn sem sér alveg hvað er hægt að gera og er tilbúin til verka.“

Eitt af því sem forsætisráðherra boðaði á blaðamannafundi formanna stjórnarflokkanna í dag um fyrstu hundrað dagana var innviðafélag í eigu ríkisins. Það myndi standa fyrir stærri framkvæmdum í samvinnu við lífeyrissjóði og fjárfesta.

Kristrún sagði í Speglinum að niðurstaða lægi vonandi fyrir í árslok. Hún sagði að þjóðhagslega hagkvæmar framkvæmdir væru ein besta fjárfesting sem hægt væri að ráðast í.