Ásthildur ekki rekin úr Flokki fólksins

Sæki samantekt...

Ekki stendur til að reka Ásthildi Lóu Þórsdóttur, fráfarandi barna- og menntamálaráðherra úr Flokki fólksins. Inga Sæland, formaður flokksins, svaraði spurningu blaðamanns Heimildarinnar neitandi þegar hún var spurð hvort það væri til umræðu. Þetta kom fram á blaðamannafundi með oddvitum ríkisstjórnarinnar í hádeginu í dag.

Stjórn Flokks fólksins rak þá Karl Gauta Hjaltason og Ólaf Ísleifsson úr flokknum árið 2018 þegar Klaustursmálið svokallaða náði hámarki. Heimild er hjá flokknum að vísa félagsmönnum úr flokknum og segir orðrétt í samþykktum flokksins: „Sé félagsmaður staðinn að því að vinna gegn meginmarkmiðum og hagsmunum Flokks fólksins, skal hann sviptur félagsaðild og skal það gert á stjórnarfundi með auknum meirihluta atkvæða og félagsmanni tilkynnt það formlega.“

Döpur yfir upplýsingaleysi

Inga Sæland sagðist döpur yfir því að Ásthildur Lóa hefði ekki upplýst hana um að að hún hefði átt í kynferðislegu sambandi við fimmtán ára gamlan táningspilt, Eirík Ásmundsson, fyrir um 35 árum síðan. Þá var hún sjálf 22 ára. Ári síðar eignaðist hún barn með honum og því var haldið fram að hún hafi tálmað umgengni hans við barnið. Því hafnar Ásthildur í viðtali við RÚV í gærkvöldi og segir hann hafa verið óáreiðanlegan föður. Þá bætir hún um betur í yfirlýsingu í dag og segir hegðun hans hafa verið í ætt við eltihrella.

Þingflokksformaður Flokks fólksins: „Við erum bara að melta þetta“

Formaður Flokks fólksins stendur að því er virðist á bak við Ásthildi. Spurð hvort Ásthildi Lóu væri stætt á þingi sagði hún það í höndum Ásthildar sjálfrar.

Ljóstraði upp um nafn þess sem bar upp erindið

Forsætisráðuneytið fékk erindi inn á sitt borð viku áður en ráðherra sagði af sér. Ásthildur greindi sjálf frá því í viðtali við Vísi að sá sem sendi erindið hefði verið Ólöf [Bjarnadóttir], fyrrverandi tengdamóðir Eiríks Ásmundssonar. Kristrún Frostadóttir sagði á blaðamannafundi, bæði í gær og í dag, að hún hafi ekki vitað um sannleiksgildi ásakanna fyrr en í gær, sama dag og Ásthildur segir af sér embætti. Þá hafnar hún ásökunum um trúnaðarbrest, þar sem Ólöf hafði verið spurð hvort barna- og menntamálaráðherra mætti sitja sama fund. Hún hafi fallist á það ef ráðherra teldi það við hæfi.

Á þriðjudaginn setur Ásthildur Lóa sig í samband við Ólöfu og endar á því að fara heim til hennar. Ekki hefur náðst í Ólöfu til þess að spyrja frekar út í þau samskipti. Þetta telur Kristrún óvenjulegt, eins og hún sagði á fundi í gær.

Finnst málið ósanngjarnt

Leiðtogar ríkisstjórnarflokkanna telja málið ekki hafa áhrif á stjórnarsamstarfið og líta svo á að það sé persónulegt mál Ásthildar Lóu sem hafi þegar axlað ábyrgð.

Það er þó óljóst hvað sé átt við með að Ásthildur hafi axlað ábyrgð. Í viðtali við Vísi sagði hún:

Ásthildur Lóa lýsir barnungum barnsföður sínum sem eltihrelli

„Þá var ég 22 ára gömul og var í sambandi við mann sem var yngri en ég, sextán ára,“ sagði hún og sagði að hann hefði sótt mjög í hana. „Hann var ofboðslega hrifinn af mér. Hann var mjög aðgangsharður, svo ekki sé meira sagt. Og fyrir rest-ég bara réði ekki við ástandið eins og það var.“

Þá var hún gráti næst þegar hún sagði það erfiðasta sem hún hefði gert væri að láta af störfum sem ráðherra. „Við vitum það hvernig fréttir eru í dag. Við vitum að svona mál, ef ég væri áfram ráðherra, væri það dregið upp aftur og aftur og aftur. Það yrði aldrei neinn vinnufriður fyrir ríkisstjórnina og ekki heldur í málefnunum sem ég brenn fyrir.“

Aðspurð hvort henni þætti þetta ósanngjarnt svaraði hún: „Já, ég verð að segja að mér finnst það.“

Illskiljanleg svör Ingu Sæland

Inga Sæland tekur í svipaðan streng þegar hún er spurð á blaðamannafundi í dag um afsögn Ásthildar Lóu, em hún heyrði fyrst af í gær klukkan 14:00.

„Við fengum að upplifa það hvernig við sjáum einn einstakling gjörsamlega mulinn mélinu smærra. Það var nákvæmlega það í gær þegar hæstvirtur mennta- og barnamálaráðherra brotnaði niður undan þessu álagi,“ sagði Inga.

Kristrún segist fyrst hafa heyrt sannleikann í dag

Spurð hvort Inga hefði skipað Ásthildi Lóu sem barna- og menntamálaráðherra hefði hún vitað sannleikann, sagði Inga spurninguna óskiljanlega. Hún svaraði henni engu að síður, þó með illskiljanlegum hætti.

„Hún hefði sennilega sjálf aldrei gefið kost á því ef það hefði verið útlitið eins og það er í dag,“ sagði Inga. Blaðamaður Heimildarinnar spurði hana þá hvað hún ætti við með þessum orðum.

Inga svaraði: „Umræðan eins og hún er í dag. Athyglin eins og hún er í dag. Ástæðan fyrir því að hún sagði af sér.“

Blaðamaður spurði þá: „Af hverju heldur þú að hún hafi sagt af sér?“

Inga spurði þá á móti: „Viltu ekki bara spyrja Ásthildi Lóu að því? Ég get ekki svaraði því, en ég meina hún axlar hér ábyrgð. Og telur að hennar persónulegu mál eigi aldrei að skyggja á okkar góða samstarf þannig að hún tekur mjög hetjulega ákvörðun, fordæmalausa ákvörðun, við erum ekki vön að sjá slíkar ákvarðanir teknar á eins skömmum tíma. Og ég held að það sé sögulegt.“