Frumvarp um afturköllun alþjóðlegrar verndar lagt fram

Sæki samantekt...

Þorbjörg Sigríður Gunnlaugsdóttir dómsmálaráðherra hefur lagt fram frumvarp um breytingu á lögum um útlendinga. Lagabreytingin myndi heimila stjórnvöldum að afturkalla alþjóðlega vernd þeirra sem brjóta alvarlega af sér hérlendis.

Aukin heimild yfirvalda til að afturkalla alþjóðlega vernd hefur verið til umræðu síðastliðið ár. Guðrún Hafsteinsdóttir formaður Sjálfstæðisflokksins sagði við mbl.is í fyrra, þegar hún var dómsmálaráðherra, að tilefni væri til að skoða slíka lagabreytingu.

Afturkalla vernd fyrir sérstaklega hættuleg afbrot

Í tillögum breytinga á 48. grein laga um útlendinga er lagt til að nýrri málsgrein verði bætt við sem hljóðar svo:

„Heimilt er að afturkalla veitingu alþjóðlegrar verndar ef gildar ástæður eru til að álíta hann hættulegan öryggi ríkisins eða hann hefur hlotið endanlegan dóm fyrir sérstaklega alvarlegt afbrot og er af þeim sökum hættulegur samfélaginu.“

Í annarri tillögu að nýrri málsgrein er tilgreint að við afturköllun alþjóðlegrar verndar útlendings falli útgefið dvalarleyfi og atvinnuleyfi hans úr gildi.

Greint er frá því í frumvarpinu hvað átt sé við með sérstaklega alvarlegu afbroti. Það eigi m.a. við „manndráp, ofbeldis- eða kynferðisbrot, frelsissviptingarbrot, meiri háttar fíkniefnabrot, brennu eða önnur almannahættubrot, rán og skipulagða brotastarfsemi.“

Þessi frétt er unnin af meistaranema við Háskóla Íslands í starfsnámi á fréttastofu RÚV.