Öll börn á Íslandi hafi aðgang að sömu þjónustu

Sæki samantekt...

Daði Már Kristófersson, fjármála- og efnahagsráðherra, segir breytta ábyrgðaskiptingu ríkis og sveitarfélaga, í sérhæfðri þjónustu við börn með fjölþættan vanda, hafa þau áhrif að öll börn á Íslandi munu búa við sömu nálgun í málaflokknum. Breytingin muni þannig jafna nokkurn mun sem hefur verið á þjónustu við þessi börn á milli sveitarfélaga.

Samkomulag um breytt fyrirkomulag milli ríkis og sveitarfélaga vegna uppbyggingar hjúkrunarheimila var einnig undirritað í dag. Spurður um þýðingu breytingunnar segir Daði hana vonandi koma til með að flýta uppbyggingu hjúkrunarrýma.

„Þetta þýðir að ríkið eitt tekur ákvörðun um þá uppbyggingu og stýrir henni. Þannig að fjárhagsleg ákvörðun sveitarfélagana er þá ekki bein lengur. Það getur vonandi flýtt uppbyggingunni.“

Málin eru í stjórnarsáttmála ríkisstjórnarinnar

„Varðandi börn með fjölþættan vanda þýðir þetta fyrst og fremst samhæfingu í þjónustu, þetta eru ekki mörg börn en þau búa auðvitað vítt og breitt um landið í sveitarfélögum með allskonar getu til þess að takast á við þeirra vanda.“

Þannig að þetta jafnar líka mun á þeirri þjónustu sem börnum býðst á milli sveitarfélaga?

„Já, þetta myndi verða til þess að öll börn á Íslandi búa við sömu nálgun.“

Hvernig mun ríkið fara að fjármögnun þessara breytinga?

„Bæði þessi mál voru í stjórnarsáttmála ríkisstjórnarinnar og það var búið að gera ráð fyrir að fjármagna báða þessa liði í drögum að fjármálaáætlun, sem við munum kynna núna á næstu vikum.“