Bað Pútín um að hlífa her­mönnum sem enginn kannast við

Sæki samantekt...

Donald Trump, forseti Bandaríkjanna, segir að hann og/eða erindrekar hans hafi átt gott og uppbyggilegt samtal við Vladimír Pútín, forseta Rússlands, í gær. Hann segir góðar líkur á því að hægt verði að binda enda á innrás Rússa í Úkraínu, þó Pútín hafi hafnað vopnahléstillögu Bandaríkjamanna í gær og lagt fram viðbótarkröfur.

Trump sagði frá samtalinu við Pútín á Truth Social, hans eigin samfélagsmiðli, en óljóst er hvort hann hafi sjálfur rætt við Pútín eða sé að tala um erindreka sína sem eru í Moskvu. Hann skrifaði einnig að hann hefði beðið Pútín um að þyrma lífum „þúsunda úkraínskra hermanna“ sem eiga að vera umkringdir af rússneskum hermönnum.

Þar á hann væntanlega við Kúrsk-hérað, þar sem úkraínskir hermenn hafa verið á undanhaldi, en útlit er að þær fregnir hafi Trump fengið frá Pútín sjálfum, því enginn kannast við umkringda úkraínska hermenn.

„Þetta yrði hræðilegt blóðbað, slíkt hefur ekki sést frá seinni heimsstyrjöldinni. Guð blessi þá alla!“ skrifaði Trump.

Engar fregnir hafa borist af því að Rússar hafi umkringt fjölda úkraínskra hermanna í Kúrsk. Rússneskir herbloggarar hafa sagt að hermenn sem voru í hættu á að vera króaðir af hafi komist undan.

Í nýjustu yfirlýsingum varnarmálaráðuneytis Rússlands um gang mála vegna innrásarinnar kom ekkert fram um umkringda úkraínska hermenn í Kúrsk. Þar segir að átök standi enn yfir og að drónar séu notaðir gegn hersveitum á undanhaldi.

Sjá einnig: Hörfa frá Kúrsk

Herforingjaráð Úkraínu hefur sent út tilkynningu vegna ummæla Trumps. Þeir segja enga hermenn í Kúrsk umkringda. Rússar séu að búa til þessar sögusagnir í pólitískum tilgangi.

Ráðið segir úkraínska hermenn hafa hörfað í betri varnarstöðu. Þeir berjist enn í Kúrsk og að í dag hafi að minnsta kosti þrettán sinnum komið til átaka við rússneska hermenn í héraðinu.

Повідомлення про нібито „оточення“ противником українських підрозділів в Курській області не відповідають дійсності та створюються росіянами заради політичних цілей і тиску на Україну та партнерів. pic.twitter.com/r 35 yCXjzUk]]-Генеральний штаб ЗСУ (@GeneralStaffUA) March 14, 2025

Hermenn með bundnar hendur teknir af lífi

Pútín fór til Kúrsk í fyrradag, þar sem hann talaði um að komið yrði fram við úkraínska hermenn í Kúrsk eins og hryðjuverkamenn. Í gær sagði Dmitró Lubinets, sem kemur að mannréttindamálum fyrir ríkisstjórn Úkraínu, frá því að rússneskir hermenn hefðu tekið að minnsta kosti fimm úkraínska stríðsfanga af lífi.

Rússneskir hermenn hafahafa í vikunni deilt myndbandi á netinu sem sýnir fimm menn klædda úkraínskum herbúningum liggja látna í jörðinni í Kúrsk. Fjórir þeirra voru með hendur bundnar fyrir aftan bak og annað myndefni sem birt hefur verið á netinu sýndi hermennina lifandi eftir að þeir gáfust upp og voru handsamaðir af Rússum.

Í yfirlýsingu frá Lubinets segir hann að aftökum sem þessum hafi fjölgað verulega og er sú yfirlýsing studd af myndefni sem rússneskir hermenn og Úkraínumenn hafa birt á undanförnum mánuðum.

Lubinets segir þeta til marks um kerfisbundnar aftökur á úkraínskum stríðsföngum og að ummæli Pútíns um hryðjuverkamenn vísi til þess að hermönnum hafi verið skipað að taka úkraínska fanga af lífi.

Opinn fyrir vopnahléi eeeen…

Bandarískir erindrekar ferðuðust í gær til Rússlands þar sem þeir hafa rætt við ráðamenn um tillögu þeirra að þrjátíu daga almennu vopnahléi í Úkraínu. Ráðamenn í Kænugarði hafa samþykkt tillöguna.

Pútín tjáði sig um tillöguna í gær, þar sem hann sagðist opinn fyrir vopnahléi en hafnaði tillögu Bandaríkjamanna. Lagði hann fram skilyrði sem ólíklegt þykir að verði samþykkt.

Meðal þeirra krafna sem ráðamenn í Rússlandi hafa opinberað vegna innrásarinnar í Úkraínu er að fá fjögur héruð Úkraínu, sem þeir stjórna ekki að fullu, auk Krímskaga, að Úkraína afvopnist, fái ekki inngöngu í NATO og jafnvel það að NATO hörfi alfarið frá Austur-Evrópu.

Kröfurnar fela í raun í sér uppgjöf Úkraínu og varnarleysi í framtíðinni.

Washington Post sagði frá því í gær að starfsmenn leyniþjónusta Bandaríkjanna væru þeirrar skoðunar að Trump hefði ekki látið af þeim ætlunum sínum að ná yfirráðum yfir Úkraínu. Skýrsla hafi verið samin fyrr í þessum mánuði þar sem fram kemur að Pútín hafi ekki áhuga á að binda enda á stríðið en Trump hefur þó ítrekað haldið því fram á undanförnum vikum.

Heimildarmenn WP segja að jafnvel þó Pútín endi á því að samþykkja vopnahlé muni hann nota það til að fylla upp í raðir hersveita sinna og undirbúa nýjar árásir. Hann væri líklegur til að brjóta gegn vopnahléinu og í senn saka Úkraínumenn um að bera ábyrgð á því.

Pútín sagði í gær að vopnahlé yrði að fylgja skilyrði um að Úkraínumenn mættu ekki styrkja varnir sínar að nokkru leyti yfir þrjátíu daga tímabilið.

Vill ólmur gera samkomulag

Einn heimildarmanna WP sagði svo virtist sem að greiningar leyniþjónusta Bandaríkjanna um að Pútín vildi áfram ná yfirráðum í Úkraínu, færu í taugarnar á Trump.

„Forsetinn vill ólmur ná samkomulagi og Rússar eru ekki að sýna nein merki um að þeir vilji láta eftir. Þeir eru að auka kröfur sínar.“

Ný könnun sem Reuters og Ipsos gerðu í Bandaríkjunum sýnir að meirihluti Bandaríkjamanna þyki Trump of náinn yfirvöldum í Moskvu.

Í heildina sögðust 56 prósent aðspurðra sammála því. Meðal stuðningsmanna Demókrataflokksins var hlutfallið 89 prósent en það var 27 prósent meðal stuðningsmanna Repúblikanaflokksins.