Starfsmenn Waltz sakaðir um að senda leynileg skjöl í gegnum Gmail

Sæki samantekt...

Mike Waltz þjóðaröryggisráðgjafi Hvíta hússins liggur undir nýjum ásökunum um að hafa farið óvarlega með gögn eftir að miðillinn Washington Post sagði í dag að aðstoðarmaður hans hefði notað tölvupóstforritið Gmail til þess senda leynileg gögn um hernaðarlegar staðsetningar og vopn.

Waltz hlaut áður heimsathygli eftir að upp komst að hann bætti ritstjóra tímaritsins The Atlantic í spjallhóp á samskiptaforritinu Signal þar sem árás á Húta í Jemen var rædd af háttsettum ráðamönnum bandaríkjastjórnar.

Miðillinn Washington Post birti umfjöllun sína í dag en þar er því einnig haldið fram að Waltz hafi sjálfur látið senda sér vinnuskjöl og tímaáætlanir á sinn eigin Gmail-reikning.

Hvíta húsið staðfesti í dag að Waltz hefði fengið tölvupósta senda á sinn persónulega reikning en að hann hefði haft sinn formlega tölvupóst í „cc“ til þess að fullnægja lögum um varðveislu gagna.

Brian Hughes, talsmaður Hvíta hússins, tók fram að Waltz hefði aldrei látið senda leynileg skjöl á persónulegan tölvupóst sinn eða á aðra. Hughes sagðist ekki geta brugðist við ásökunum Washington Post um að aðstoðarmaður Waltz hefði notað Gmail til þess að senda leynileg gögn, þar sem Hvíta húsið hefði ekki fengið afrit af þeim gögnum sem miðillinn vísaði í.

Þá sagði hann skrif Washington Post einungis tilraun til þess að afvegaleiða athygli bandarísku þjóðarinnar frá farsælli þjóðaröryggisáætlun Donald Trump forseta Bandaríkjanna.