Vill meta gagn menntakerfis

Sæki samantekt...

Mikilvægt er að í menntakerfinu verði að finna einhverja mælikvarða á árangur. Þetta segir Ásgeir Jónsson seðlabankastjóri.

Morgunblaðið og mbl.is hafa undanfarið ár fjallað ítarlega um skólakerfið á Íslandi, skort á samræmdum mælikvörðum og óskýrar einkunnir grunnskólabarna, sem foreldrar jafnvel skilja ekki.

Samræmt námsmat hefur ekki verið framkvæmt í um fimm ár á Íslandi, að undanskildu alþjóðlega PISA-prófinu. Þar hefur árangur barna hér á landi farið hríðversnandi í alþjóðlegum samanburði, svo mjög að talað hefur verið um neyðarástand í málaflokknum.

Bólar vart á öðrum aðgerðum

Í kjölfar umfjöllunarinnar sem hófst síðasta sumar ákváðu skólayfirvöld að flýta innleiðingu svokallaðs matsferils, sem á að leysa gömlu samræmdu könnunarprófin af hólmi.

Ef áætlanir ganga eftir verður ferillinn innleiddur í öllum grunnskólum á næsta skólaári, en þó aðeins í íslensku og stærðfræði þar sem hann er enn í þróun.

Vart hefur bólað á öðrum aðgerðum til að sporna við slæmri þróun menntamála á Íslandi.

Starf kennara orðið miklu erfiðara

„Það eru margar ástæður fyrir því af hverju starf kennara hefur orðið miklu erfiðara á síðustu árum,“ segir Ásgeir í samtali við Morgunblaðið.

„Ég er nú fyrrverandi kennari sjálfur og þess vegna finnst mér mjög mikilvægt að þarna séu tengdir saman hagsmunir,“ bætir hann við og á þar við hagsmuni nemenda annars vegar og kennara hins vegar.

„Það má síðan deila um hverjir þeir ættu að vera og ég ætla ekki að hafa vit á því.“

Mikilvægt að setja markmið

Ásgeir hefur áður sagt að almennt sé mjög mikilvægt, þegar kemur að þjónustu ríkisins, að sett séu markmið sem tengd eru við fjárveitingar.

Hann segir að setja verði upp árangursviðmið og gæta þess að launahækkanir séu tengdar einhverjum árangri sem samningarnir eiga að skila fyrir þjóðina, eins og bættu menntakerfi, og vísar til nýrra kjarasamninga kennara.

„Það er ekki sjálfgefið, að það að hækka laun einhverra hópa komi til baka til þjóðarbúsins. Þannig held ég að það sé mjög mikilvægt hvernig samningunum er fylgt eftir og að það verði tryggt að einhver trúverðugur árangur verði.“

Launahækkanir tengdar árangri

Ásgeir hefur sagt að almennt sé mjög mikilvægt þegar kemur að þjónustu ríkisins að það séu sett einhver markmið sem tengd eru saman við fjárveitingar.

Hann segir að setja verði upp árangursviðmið og gæta þess að launahækkanir séu tengdar einhverjum árangri sem samningarnir eiga að skila fyrir þjóðina, eins og bættu menntakerfi.

„Það er ekki sjálfgefið að það að hækka laun einhverra hópa komi til baka til þjóðarbúsins. Þannig held ég að það sé mjög mikilvægt hvernig samningunum er fylgt eftir og að það verði tryggt að einhver trúverðugur árangur verði.“