Enn er von til þess að fólk finnist á lífi í rústunum

Sæki samantekt...

Þrátt fyrir erfiðar aðstæður á hamfarasvæðunum í Mjanmar er enn von til þess að fólk finnist á lífi, segir Gísli Rafn Ólafsson framkvæmdastjóri Rauða krossins. Fleiri en 2.000 hafa fundist látin eftir jarðskjálftana á föstudag og hundraða er enn saknað. Hátt í 4.000 slösuðust í hamförunum og heilbrigðisstofnanir ráða ekki við álagið.

Gísli Rafn hefur reynslu af björgunarstarfi á hamfarasvæðum og var stjórnandi hjá íslensku alþjóðabjörgunarsveitinni þegar hún fór til Haítí 2010.

Hann segir að enn sé von til þess að fólk finnist á lífi. „Ótrúlegt en satt þá er enn þá von og það hafa verið að finnast einstaklingar á lífi núna bara síðustu klukkutímana, bæði ófrísk kona og ung stúlka.“

Stjórnvöld í Mjanmar segja að fleiri en 2.000 hafi fundist látin, og um 3.900 séu slösuð. Óttast er að fleiri finnist látin því hundraða er enn leitað. Alþjóðaheilbrigðisstofnunin segir að heilbrigðiskerfið í Mjanmar ráði ekki við álagið. Þrjú sjúkrahús eyðilögðust í hamförunum og 22 skemmdust.

Gísli Rafn segir að ástandið á hamfarasvæðunum sé mjög slæmt. „Það er 40 stiga hiti og það er oft talað um að ef þú ert með mikinn hita þá sé það aðgangur að vatni sem skipti öllu máli, hvort þú náir að lifa af. Og það eru því miður líka fregnir af því að sveitir hafi verið að heyra í fólki en síðan þegar loksins var hægt að komast að því þá var fólkið látið.“

Mikil eyðilegging nærri upptökum skjálftanna

Aðstæðurnar sem björgunarfólk stendur frammi fyrir eru mjög krefjandi. „Þetta eru byggingar sem hafa hrunið og mjög oft hrynja niður í það sem við köllum pönnuköku, það er að segja þá gefa útveggirnir sig og þú færð loftið niður á þig. Þá er alltaf spurningin um það hvort einhvers staðar hafi myndast smá hol sem fólk nær að vera í.“

Eyðileggingin er mjög mikil í Mjanmar. Stærsti skjálftinn, sem reið yfir á föstudag, var 7,7 að stærð. „Maður hefur verið að heyra af því líka að bæir og borgir í nágrenninu við upptökin sem björgunarsveitir eru að komast til, fyrst núna, að þar er talað um 80 — 90% húsanna séu eyðilögð,“ segir Gísli Rafn.

Rauði krossinn á Íslandi hefur hafið neyðarsöfnun fyrir þolendur jarðskjálftanna.