Al­fons og Willum spiluðu báðir í stór­sigri gegn botnliðinu

Sæki samantekt...

Willum Þór Willumsson var í byrjunarliðinu og Alfons Sampsted kom inn af bekknum hjá toppliði Birmingham í 4 — 1 sigri gegn Shrewsbury, neðsta liði League One deildarinnar á Englandi.

Willum byrjaði fremstur á miðju að vana og átti mun betri leik í dag en í síðustu leikjum, samkvæmt staðarmiðlinum Birmingham Mail. Honum var síðan skipt af velli eftir rúmar sjötíu mínútur.

Alfons Sampsted kom inn á skömmu áður, rétt eftir að Birmingham hafði tekið 2–0 forystu. Hann kláraði svo leikinn í hægri bakvarðarstöðunni. Birmingham komst fjórum mörkum yfir en Shrewsbury klóraði í bakkann undir lokin og lokatölur urðu 4-1.

Alfons hefur nú komið við sögu í síðustu fjórum leikjum eftir bekkjarsetu í fimm leikjum þar á undan.

Birmingham er í efsta sæti deildarinnar, með níu stiga forystu og tvo leiki til góða á Wrexham í öðru sætinu.

Króatíski boltinn

Danijel Dejan Djuric kom inn af varamannabekknum og spilaði síðasta hálftímann í 2–1 sigri Istra gegn Osijek. Istra komst yfir rétt fyrir hálfleik og settu síðan sigurmarkið á þriðju mínútu uppbótartíma eftir að hafa fengið á sig jöfnunarmark um miðjan seinni hálfleik.

Logi Hrafn Róbertsson sat á bekknum allan leikinn, líkt og hann hefur gert síðastliðinn mánuð.

Istra er í sjöunda sæti deildarinnar þegar níu umferðir eru eftir. Í miklu miðjumoði, tíu stigum frá fallsvæðinu og þrettán stigum frá Evrópubaráttunni.