Rússar segja að starfsfólki íslenska sendiráðsins hafi ekki verið ógnað

Sæki samantekt...

Maria Zakharova, talskona rússneska utanríkisráðuneytisins, skellti upp úr á blaðamannafundi í gær þegar hún var spurð hvort starfsfólki íslenska sendiráðsins í Moskvu hefði verið ógnað.

„Leyfðu mér að segja þér satt. Þetta er auðvitað lygi, það liggur fyrir,“ sagði Zakharova.

Morgunblaðið greindi fyrst frá og vísaði í frétt Pravda.

Þórdís Kolbrún Reykfjörð Gylfadóttir, fyrrverandi utanríkisráðherra, greindi fréttastofu frá því á dögunum að starfsfólki íslenska sendiráðsins hefði verið ógnað með ýmsum hætti og að ekki hefði verið hægt að tryggja öryggi þess í Moskvu. Það hefði átt þátt í því að sendiráðinu var lokað en þó ekki verið meginástæða þess.

Ísland þjáist af Rússafóbíu

Þorgerður Katrín Gunnarsdóttir, núverandi utanríkisráðherra, tók undir með Þórdísi og sagði að friðhelgi starfsfólks sendiráðsins hefði verið gróflega brotin.

Spurð um ummæli núverandi og fyrrverandi utanríkisráðherra sagði Zakharova augljóst að þær hefðu gert það til þess að sýna hollustu sína við Atlantshafsbandalagið og andrússneska stefnu Vesturlandanna.

Ákvörðunin um að loka sendiráðinu hefði valdið óbætanlegu tjóni á samstarfi þjóðanna enda ljóst að Ísland þjáðist af „Rússafóbíu“ og styddi „nýnasista í Kænugarði.“

Jafnframt sagði hún framt að þeim hefðu ekki borist neinar kvartanir frá íslenskum stjórnvöldum um ógnanir eða hótanir í garð íslenska sendiráðsins eða starfsfólks þess.