„Það er spurning hvað maður kallar mjög lítið notað“

Sæki samantekt...

Barnamálaráðherra segir það til marks um þunga stöðu í barnaverndarmálum að börn hafi verið neyðarvistuð í fangaklefa tíu sinnum í mánuði síðustu fjóra mánuði. Það þurfi þó ekki endilega að teljast mjög mikil notkun.

Umboðsmaður barna birti í vikunni harðort bréf sem sent var á mennta- og barnamálaráðuneytið og Barna- og fjölskyldustofu, og sagði að farið hefði verið fram með villandi hætti um notkun á neyðarvistunarúrræði barna á lögreglustöðinni í Hafnarfirði. Því hafi ítrekað verið lýst í samskiptum að úrræðið sé í lítilli notkun og að börn séu ekki vistuð þar lengur en í tvo daga í senn. Gögn málsins sýni hins vegar að börn hafi verið vistuð þar í 41 skipti síðan í lok október, í allt að sex daga í senn.

„Það er spurning hvað maður kallar mjög lítið notað en þarna sýnir svo sem alvarleika málsins að það þurfi svona oft að neyðarvista börn,“ segir Ásthildur Lóa Þórsdóttir mennta- og barnamálaráðherra.

En 41 skipti á fjórum mánuðum. Myndirðu kalla það litla notkun?

„Það eru um tíu skipti á mánuði. Það er í sjálfu sér ekkert svakalega mikið,“ segir Ásthildur Lóa en tekur fram að þetta undirstriki þunga stöðu í málaflokknum og mikilvægi þess að bæta úrræðin.

Barna- og fjölskyldustofa hefur lýst því að þetta úrræði hafi verið tekið í notkun þar sem ekkert annað hafi verið í boði.

Umboðsmaður barna fer mjög hörðum orðum um þetta og segir ekkert geta réttlætt það að setja börn í fangaklefa. Geturðu tekið undir þetta og hvers vegna heimilar barnamálaráðherra úrræði sem þetta þegar þetta er metið með öllu óviðunandi?

„Nú er þetta úrræði sem var tekið í notkun fyrir mína tíð. Það sem ég er búin að gera síðan, það er búið að koma í gang þessari hröðu uppbyggingu á Stuðlum. Þetta er ekki æskilegt úrræði en þá spyr ég á móti, hvað á að gera?

Aðspurð hvort það standi ekki á ráðherra að finna út úr því hvað eigi að gera, segir hún að það sé vissulega rétt og að verið sé að vinna í hlutunum.

„Ég er búin að vinna að þessu hörðum höndum. Það eru að koma tvö úrræði á Stuðla — það er ekki hægt að rífa þau upp á einum degi,“ segir hún.

Forstöðumaður meðferðarsviðs Barna- og fjölskyldustofu sagði í fréttum í gær að Flatahrauni verði lokað um mánaðamótin, um leið og búið sé að koma upp nýrri neyðarvistun á Stuðlum.