Zelensky kallar eftir frekari refsiaðgerðum gegn Rússum

Sæki samantekt...

Tuttugu hið minnsta létust og tugir særðust í sprengjuárásum Rússa á Úkraínu í nótt. Rússar gerðu einnig sprengju- og drónaárásir á Kharkiv-hérað í norðausturhluta Úkraínu.

Zelensky Úkraínuforseti kallaði í dag eftir frekari refsiaðgerðum og viðskiptaþvingunum gegn Rússlandi, á samskiptamiðlinum Telegram.

„Sprengjuárásir næturinnar sýna að markmið þeirra sé enn hið sama. Því verður að aðstoða Úkraínumenn við að verja íbúa og styrkja lofthelgi sína.“

Kaja Kallas, utanríkismálaráðherra Evrópusambandsins sagði á samfélagsmiðlinum X að sprengjuárásir næturinnar sýndu að stjórnvöld í Rússlandi hefðu engan áhuga á friði.

Kaja Kalllas er utanríkismálaráðherra Evrópusambandsins. AP/Virginia Mayo

„Rússnesk flugskeyti falla án afláts í Úkraínu, þeim fylgja dauði og mikil eyðilegging. Enn og aftur sýnir Pútín að hann hefur engan áhuga á friði.“

Hún bætti við að Evrópuþjóðir verði að auka hernaðarlegan stuðning við Úkraínu, annars láta enn fleiri Úkraínumenn lífið.

Donald Tusk, forsætisráðherra Póllands, sagði einnig á X að þetta hafi verið önnur sorgleg nótt í Úkraínu. „Þetta gerðist þegar einhver reynir að friðþægja villimenn.“

Rússneski herinn náði þremur þorpum í Kúrsk á sitt vald

Donald Trump Bandaríkjaforseti sagðist í gær vera að íhuga alvarlega að setja viðskiptaþvinganir og tolla á Rússa, vegna ítrekaðra árása þeirra á Úkraínu. Hann hvatti bæði ríki til að koma strax að samningaborðinu, áður en það væri um seinan.

Í byrjun vikunnar ákvað Trump að hætta allri hernaðaraðstoð við Úkraínu, bandaríska leyniþjónustan hætti að deila upplýsingum með þeirri úkraínsku og í gær hætti varnarmálaráðuneytið að deila gervihnattamyndum með Úkraínumönnum. Þær geta verið mikilvægt tól til upplýsingaöflunar um óvininn í hernaði.

Rússneski herinn sagði í morgun að hann hafi náð þremur þorpum í Kúrsk-héraði í Rússlandi aftur á sitt vald. Úkraínuher hóf óvænta sókn í héraðið í ágúst. Undanfarnar vikur hefur rússneski herinn náð meirihluta landsvæðisins aftur.