Beinir spjótum sínum að Smithsonian og „sögufölsunum“

Sæki samantekt...

Donald Trump Bandaríkjaforseti hefur gefið út enn eina forsetatilskipunina þar sem hann meðal annars felur varaforsetanum J.D. Vance að uppræta „and-bandaríska hugmyndafræði“ á yfir tuttugu söfnum og rannsóknarstofnunum Smithsonian.

Tilskipunin ber fyrirsögnina „Restoring Truth and Sanity to American History“, sem má lauslega þýða „Endurheimt sannleika og almennrar skynsemi þegar kemur að sögu Bandaríkjanna“.

Þar segir að þingið eigi ekki að fjármagna sýningar á Smithsonian-söfnunum sem stuðla að aðgreiningu Bandaríkjamanna eftir kynþætti. Þá er því haldið fram að til hafi staðið að „viðurkenna karla sem konur“ á nýju safni um sögu Kvennasögusafni.

Tilskipunin er þó víðtækari og þar er innanríkisráðherranum Doug Burgum einnig falið að vinda ofan af breytingum sem gerðar hafa verið á eignum í eigu alríkisins, til að mynda görðum, minnisvörðum og styttum, „sem hafa verið fjarlægðar eða verið breytt á síðustu fimm árum til að byggja undir falska endurskoðun sögunnar“.

Gera má ráð fyrir að þarna sé aðallega verið að vísa til hinna ýmsu breytinga sem hefur verið ráðist í til að gera Suðurríkjasambandinu, og þar með þrælahaldi, ekki hátt undir höfði.