Óvíst hversu mikil áhrif tollar hafa á íslensk fyrirtæki

Sæki samantekt...

Birni Steinari Jónssyni, framkvæmdastjóra Saltverks, líst ekki vel á tilkynningu Bandaríkjaforseta um tolla, „ekki frekar held ég heldur en flest öllum öðrum sem stunda alþjóðviðskipti. Enda er þetta kannski ekki alveg í þá átt sem heimurinn hefur verið að stefna með alþjóðaviðskiptum undanfarna áratugi.“

Bandaríkin eru stærsti markaður Saltverks, sem flytur út salt unnið með jarðhita við Ísafjarðardjúp. Hann bendir þó á að Ísland fái lægri tolla en margar aðrar þjóðir. Þá megi helst gera sér í hugarlund að tollar leiði til verðhækkana á vörum í Bandaríkjunum frekar en að kostnaðurinn fari inn í reksturinn.

Tollunum er ætlað að elfa iðnað í Bandaríkjunum og jafnvel að fá fyrirtæki til að flytja starfsemi sína þangað.

„Í okkar tilfelli erum við svo sem að nota jarðhita á Íslandi til þess að, til þess að framleiða okkar vörur og það er það sem skapar okkur sérstöðu,“ segir Björn. „Þannig að við erum ekkert að fara að breyta því og það hefur verið og ég geri ráð fyrir að það verði áfram mikil eftirspurn eftir okkur vörum á Bandaríkjamarkaði,“

Enn er því óvíst hversu mikil áhrif tollarnir hafa á rekstur íslenskra fyrirtækja sem selja vörur á Bandaríkjamarkað. Björn Steinar telur ekki að tollar hafi áhrif á stefnu fyrirtækisins hvað varðar erlenda markaði að sinni og bendir á núverandi ríkisstjórn sé ekki uppálagt að starfa nema næstu fjögur árin.

Þá sé enn óreynt hvernig tollarnir verði í framkvæmd þrátt fyrir tilkynningar í fjölmiðlum. Það hafi dótturfélag Saltverk í Bandaríkjunum fengið að reyna þegar Trump tilkynnti tolla á flutning til Kanada.

„Við sendum sendingar til Kanada og þegar hann tilkynnti fyrirvaralaust í fjölmiðlum að það væru settar á tollar þangað voru flutningsaðilar með vörur á leiðinni fyrir okkar. Þeir sendu frá sér einhverjar tilkynningar en það var ekkert raunverulega komið í framkvæmd þó það hafi verið tilkynnt til fjölmiðla.“