Þrenns konar merki um yfirvofandi gos

Sæki samantekt...

„Staðan er í sjálfu sér óbreytt, við erum á neyðarvaktinni og fylgjumst grannt með framvindu mála,“ segir Birna Lárusdóttir, upplýsingafulltrúi HS Orku í Svartsengi, eftir að gos hófst á Reykjanesskaga nú fyrir skemmstu.

„Eins og staðan er núna stendur orkuverinu ekki ógn af hraunflæði, en við þurfum eins og aðrir fylgjast með,“ segir Birna við mbl.is.

Neyðarstjórn virkjuð

Kveður upplýsingafulltrúinn starfsemi Svartsengis með eðlilegu móti, nema hvað henni sé nú stýrt frá Reykjanesvirkjun.

„Við fylgjumst mjög vel með og neyðarstjórn HS Orku er að störfum og fundaði í morgun,“ segir hún og bætir því við að borholuviðvörunarkerfi Veðurstofunnar hafi í morgun gefið þrjú merki sem fylgst væri með, varðandi jarðskjálftavirkni, borholumælingu HS Orku í Svartsengi og mælingar á ljósleiðurum.

„Eins og í gosum á þessu tímabili,“ segir Birna Lárusdóttir að lokum varðandi gang mála hjá HS Orku.

Páll Erland forstjóri Veitna bendir á að gossprungan sé skammt frá varnargarði við Grindavík, „þar með erum við að horfa til þess hvernig hún muni þróast og þar með hraunflæðið í kjölfarið“, segir forstjórinn enn fremur og bætir því við að fulltrúar Veitna hafi verið í nánu sambandi við almannavarnanefnd ríkislögreglustjóra í morgun og virkjað neyðarstjórn sína.