Níu látnir í árás Bandaríkjamanna í Jemen

Sæki samantekt...

Að minnsta kosti níu borgarar eru látnir í árásum Bandaríkjanna í Jemen í dag, að sögn uppreisnarmanna úr röðum Húta. Níu til viðbótar eru sagðir særðir eftir árásirnar sem Donald Trump Bandaríkjaforseti fyrirskipaði.

Bandaríkjaher gerði í dag umfangsmiklar árásir á uppreisnarmenn Húta í Jemen. Herinn hæfði tugi skotmarka en ráðamenn í Bandaríkjum segja árásina vera fyrsta skrefið í nýrri sóknaraðgerð til að opna aftur fyrir siglingarleiðir um Rauðahaf, sem Hútar hafa hindrað með árásum sínum síðustu mánuði.

Ljósmyndari AFP segist hafa heyrt þrjár sprengingar í Sanaa, höfuðborg Jemen, auk þess sem hann sá reyk stökkva koma úr íbúðarhúsum í norðanveðrðri borginni. Öryggissveitir hafa girt svæðið af.

Heilbrigðisráðuneyti Húta segir í yfirlýsingu að níu óbreyttir borgarar séu látnir og níu til viðbótar særðir, flestir alvarlega.

Ný aðgerð

Trump staðfesti fyrir skömmu að Bandaríkin hefðu gert árás á Húta, sem eru uppreisnarsamtök í Jemen sem njóta stuðings klerkastjórnarinnar í Íran.

Árásirnar voru ýmist frá hafi eða lofti. „Við munum beita feikilegu banvænu afli þar til við höfum náð markmiði okkar,“ skrifar hann á Truth Social.

Síðustu mánuði hafa Hútar truflað skipaferðir yfir hafsvæðið. Fyrrum stjórn Joe Bidens framkvæmdi fjölda árása á uppreisnarseggina en tókst ekki að stöðva árásir þeirra á flutningaskip fyrir fullt og allt.

Trump skrifar að meira en ár sé liðið frá því að skip sem siglir undir bandarísku flaggi hafi náð að sila í gegnum Súesskurðinn, sem tengir Miðjarðarhaf við Rauðahaf.

Hernaðaraðgerðin er sú umfangsmesta sem Trump hefur fyrirskipað á öðru kjörtímabili sínu en ráðamenn segja þær til þess fallnar að senda Írönum skilaboð. Trump hefur áður sagst vilja ná samkomulagi við Írani til þess að koma í veg fyrir að þeir eignist kjarnorkuvopn.

Gæti staðið yfir í allnokkra daga

Ráðamennirnir segja við New York Times að árásin á Hútana gæti staðið yfir í fjölda daga og gæti stigmagnast, háð því hvernig uppreisnarmennirnir bregðast við.

Öryggisþjónustur hafa átt í basli við að staðsetja vopnakerfi Húta, en þau eru talin vera framleidd í neðanjarðarverksmiðjum og smyglað inn frá Íran.

Trump heldur áfram á Truth Social: „Til allra Húta-hryðjuverkamanna: Tími ykkar er runninn upp.“ Hann sendir svo skilaboð til Írana: „Stuðningi við Húta þarf að ljúka SAMSTUNDIS!“