FH ver deildarmeistaratitilinn í handbolta

Sæki samantekt...

FH er deildarmeistari karla í handbolta 2025. Liðið sigraði ÍR, 33–29, í síðustu umferð Olísdeildarinnar sem fór fram í kvöld. FH sigraði deildina einnig í fyrra.

FH hafði yfirhöndina í leiknum allt frá upphafi en staðan í hálfleik var 19–10. ÍR náði að vinna á forskotið sem Hafnfirðingar höfðu náð en það dugði ekki til. Lokatölur urðu 33–29, fyrir FH.

RÚV/Mummi Lú

Það ríkti spenna um það hvort það yrði Grótta eða ÍR sem færi í umspil. Með sigri á Aftureldingu hefði Grótta sloppið úr umspilssætinu að því gefnu að ÍR næði sér ekki í stig á móti FH. Þá færi Grótta upp í 10. sæti á kostnað ÍR vegna betri stöðu í innbyrðis viðureignum.

Það fór ekki svo en Afturelding sigraði Gróttu eð þremur mörkum, 25-28. Afturelding náði mest fjögurra marka forystu í fyrri hálfleik áður en Grótta jafnaði metin í 15–15 rétt undir lok hans. Fyrstu mínútur seinni hálfleiks voru jafnar en svo tóku Mosfellingar völdin og tryggðu að lokum sigur.

Þá varð ljóst að Grótta mun fara í umspil um fall í Grill 66 deildina.

Þegar var vitað að Fjölnir væri fallið í Grill 66 deildina.

Fram og Afturelding skipust á sætum þar sem Fram beið ósigur á móti Stjörnunni, 31–29 og Afturelding tryggði tvö stig á móti Gróttu. Liðin eru jöfn stiga en úrslit innbyrðisviðureigna eru Aftureldingu til góða.

Efstu átta liðin spila í úrslitakeppni sem hefst í apríl. Það hafði þegar verið ráðið hvaða átta lið myndu leika í úrslitakeppninni en leikir dagsins skiptu einhverjir máli upp á það hvaða lið mætast og hvort liðin eigi heimaleikjarétt.