Mann­skæður jarð­skjálfti og vasaþjófar í dular­gervi

Sæki samantekt...

Í kvöldfréttum Stöðvar 2 fjöllum við um gríðarstóran og mannskæðan jarðskjálfta sem reið yfir Mjanmar í dag, og hafði áhrif langt út fyrir landamæri landsins, meðal annars með þeim afleiðingum að háhýsi hrundi í Taílandi og tuga er saknað.

Við fjöllum einnig um nýja landsstjórn Grænlands sem tók við völdum í dag, á sama tíma og varaforseti Bandaríkjanna er staddur í landinu. Líkt og ítarlega hefur verið fjallað um hafa Trump forseti og fleiri úr Bandaríkjastjórn lýst yfir áhuga á að koma Grænlandi undir bandarísk yfirráð. Við ræðum við formann utanríkismálanefndar Alþingis um stöðu Grænlands og afstöðu íslenska ríkisins.

Þá kynnum við okkur öldu vasaþjófnaðar sem riðið hefur yfir miðborg Reykjavíkur, skoðum mikil uppbyggingaráform við Kringluna, kynnum okkur nýjasta internet-æðið, sem snýr að undarlegri morgunrútínu og verðum í beinni úr Borgarleikhúsinu, þar sem nýtt verk verður frumsýnt í kvöld.

Þetta og fleira í kvöldfréttum Stöðvar 2 í opinni dagskrá á Stöð 2, Vísi og Bylgjunni, klukkan 18:30.