Vill koma í veg fyrir hækkanir á fyrsta ári húsaleigusamnings

Sæki samantekt...

Inga Sæland, félags- og húsnæðismálaráðherra, mælti í dag fyrir breytingum á húsaleigulögum. Frumvarp hennar leggur bann við ákvæðum í leigusamningum um að húsaleiguverðið taki breytingum á fyrstu tólf mánuðum samningstímans. Einnig á að útvíkka skyldu til að skrá húsaleigusamninga í leiguskrá Húsnæðis- og mannvirkjastofnunar og þeir verða ekki lengur undanþegnir upplýsingarétti almennings.

„Verði það samþykkt hér á Alþingi þá munu hin nýju lagaákvæði auka réttarvernd og húsnæðisöryggi leigjenda og einnig gefa stjórnvöldum þær upplýsingar sem nauðsynlegar eru til að gefa glögga mynd af leigumarkaðinum á Íslandi,“ sagði Inga.

Bryndís Haraldsdóttir, þingmaður Sjálfstæðisflokksins, sagðist telja að sæmileg málamiðlun hefði náðst við breytingar á húsaleigulögum á síðasta kjörtímabili sem veiti ágæta réttarvernd. Hún sagði vandann á leigumarkaði helst vera skort á íbúðum.

„Nú mun þetta frumvarp klárlega ekki auka framboðið, ég held að við hljótum öll að geta verið sammála um það. Einhver okkar kunna að hafa þær áhyggjur að það muni mögulega draga úr framboðinu, sem hlýtur þá að auka enn fremur á vandann ef að við erum þá sammála um að í grunninn snúist þetta um framboðsvanda.“

Inga sagði mikilvægt að auka réttindi leigutaka svo þeir fengju minnst tólf mánaða frið frá leigusölum sem hefðu nýtt sér veika stöðu leigjenda með því að krefjast hækkunar á leiguverði. Sambærileg frumvörp hafa verið lögð fram áður en ekki náð fram að ganga. Inga sagði eitt hafa breyst frá síðasta kjörtímabili.

„Við erum sem sagt í ríkisstjórn í dag, þetta frumvarp er sem sagt að verða að lögum.“