Staðfestir símafund Pútíns og Trumps

Sæki samantekt...

Talsmaður Valdimírs Pútíns Rússlandsforseta hefur staðfest símafund hans og Donalds Trumps Bandaríkjaforseta á morgun. Þar ætla þeir að ræða hvernig hægt sé að binda enda á stríðið í Úkraínu. Utanríkismálastjóri Evrópusambandsins segir ljóst að Rússar hafi ekki áhuga á friði miðað við viðbrögð þeirra vopnahléstillögu Bandaríkjanna.

Úkraínskir hermenn hörfa frá Kúrsk

Svo virðist sem það fjari undan gagnsókn Úkraínumanna í Kúrsk-héraði í Rússlandi. Herforingjaráð landsins staðfesti í gær að hermenn hefðu hörfað frá Sudzha, stærsta bænum sem Úkraínumenn höfðu á sínu valdi í Kúrsk.

Þó ber að hafa í huga að stjórnvöld í Úkraínu hafa ekki staðfest að herinn sé endanlega farinn frá Kúrsk þó að Rússar hafi náð miklu landsvæði aftur undanfarnar vikur.

Úkraínumenn vonuðust til þess að geta notað þetta til að bæta stöðu sína í friðarsamningaviðræðum við Rússa. Stjórnvöld í Bandaríkjunum lögðu fram vopnahléstillögu í síðustu viku sem Úkraínumenn hafa sagst reiðbúnir að samþykkja.

Pútín sagði á fimmtudag að hann væri hlynntur vopnahléi að ákveðnum skilyrðum uppfylltum, en hann hefur ekki skýrt frekar hver skilyrðin eru.

Spurning hvort að Rússar vilji frið í raun og veru

Á ellefta tímanum í morgun staðfesti síðan Dmitry Peskov, talsmaður Rússlandsforseta, að þeir Donald Trump ætluðu að ræða saman í síma á morgun.

Trump sagði við fjölmiðla vestanhafs í gærkvöld að hann væri vongóður um framgang í viðræðum við Rússa.

„Ég ætla að ræða við Pútín Rússlandsforseta á þriðjudag. Það var mikil vinna unnin um helgina. Ég vil hjá hvort við getum bundið enda á stríðið. Kannski getum við og kannski ekki. Ég held samt sem áður að það séu góðar líkur á því.“

Spurður hvort reynt yrði að fá Rússa eða Úkraínumenn til að gefa eitthvað eftir, sagði Trump að viðræður um skiptingu ákveðinna eigna væru þegar hafnar. Hann kvaðst búast við að þeir Pútín ræddu meðal annars um land og orkuver.

Kaja Kallas, utanríkismálastjóri Evrópusambandsins, sagði í morgun á samfélagsmiðlinum X að boltinn væri hjá Rússum. Kröfur þeirra fyrir friðarviðræðurnar setji stórt spurningarmerki við það hvort þeir vilji í raun og veru frið.