„Það sýnir að talsvert magn kviku er á ferðinni“

Sæki samantekt...

„Merki frá aflögunarmælum eru sterkari en sést hafa í síðustu atburðum á Sundhnúksgígaröðinni. Það sýnir að talsvert magn kviku er á ferðinni.“

Þetta segir í uppfærðri frétt á vef Veðurstofu Íslands eftir að kvikuhlaup hófst á Sundhnúkagígsröðinni um klukkan hálf sjö í morgun.

„Merkin sem sjást sýna að kvikan er að hreyfa sig bæði til norðausturs en einnig í suður í átt að Grindavík. Á þessu stigi er ekki hægt að fullyrða um hvar kvikan muni koma upp, en færslan á aflögunarmerkjum til suðurs sáust til að mynda ekki í eldgosinu sem hófst í nóvember 2024,“ segir í fréttinni.

Þá kemur fram að viðbragðsaðilar í Grindavík segist finna fyrir jarðskjálftum í bænum og þar sjást einnig merki um aflögun og því mögulegt að sprunguhreyfingar geti átt sér stað innan bæjarins.