Framlengja stuðning við Grindavík – Ekki ráðlegt að hefja stórtæka endurreisn strax

Sæki samantekt...

Ríkisstjórnin tók í dag ákvörðun um framhald stuðningsaðgerða við Grindvíkinga og atvinnurekendur í bænum. Breytingar verða gerðar sem miða að því að færa stuðning úr formi sértækra neyðarúrræða og í almennari farveg. Í tilkynningu frá stjórnarráðinu segir að einstaklingar og fjölskyldur í sérstaklega viðkvæmri stöðu muni áfram njóta nauðsynlegs stuðnings.

„Við viljum gefa Grindvíkingum skýr svör um framhald stuðningsaðgerða til að eyða óvissu að því marki sem það er hægt,“ er haft eftir Kristrúnu Frostadóttur forsætisráðherra í tilkynningunni. Hún lagði fram minnisblað um málefni Grindavíkur á ríkisstjórnarfundi ásamt sex öðrum ráðherrum.

Sérstaklega stutt við tekju- og eignaminni

Lög um sértækan húsnæðisstuðning falla úr gildi um næstu mánaðamót. Þess í stað verður stutt sérstaklega við tekju- og eignaminni heimili til áramóta meðan leitað verður að varanlegri lausnum á húsnæðisvanda þeirra.

Frestur til að óska eftir uppkaupum á íbúðarhúsnæði í gegnum Þórkötlu verður framlengdur um þrjá mánuði frá 31. mars. Í tilkynningunni segir að fresturinn verði ekki framlengdur á ný eftir það.

Ætla ekki að ráðast í uppkaup á atvinnuhúsnæði

„Stuðningslán til fyrirtækja verða framlengd um eitt ár, til 1. júní 2026, til að fyrirtæki geti byggt sig aftur upp í Grindavík eða flutt reksturinn ef þess er þörf. Rekstrarstuðningur við rekstraraðila verður hins vegar ekki framlengdur og fellur því úr gildi 31. mars. Í staðinn verður horft til þess að nýta almennari úrræði um opinberan stuðning við atvinnulíf gegnum Sóknaráætlun Suðurnesja,“ segir í tilkynningunni.

Stjórnvöld ætla ekki að ráðast í uppkaup á atvinnuhúsnæði í Grindavík. „Sjónum stjórnvalda verður þess í stað beint að því að greina hvort persónulegar ábyrgðir vegna atvinnuhúsnæðis eða atvinnureksturs kalli á ráðstafanir til að forða gjaldþrotum einstaklinga. Þörf fyrir slík úrræði verður könnuð með milligöngu umboðsmanns skuldara.“

Ekki ráðlegt að hefja stórtækt endurreisnarstarf

Í tilkynningu stjórnarráðsins segir að óvissa vegna jarðhræringa við Grindavík sé mikil. Ekki þykir ráðlegt að hefja stórtækt endurreisnarstarf við núverandi aðstæður.

„Jarðhræringarnar ógna mikilvægum innviðum á Suðurnesjum öllum. Því verður sjónum stjórnvalda í vaxandi mæli beint að styrkingu á áfallaþoli samfélagsins vegna þeirrar ógnar sem stafar af áframhaldandi jarðhræringum á Reykjanesskaga,“ segir í tilkynningunni.

Ráðgjafarfyrirtækið Deloitte hefur unnið greiningu á stöðu Grindavíkur og sviðsmyndum um hvernig samfélagið þar gæti orðið árið 2035. Stöðumat og sviðsmyndir greiningarinnar verða nýttar við áframhaldandi stefnumótun stjórnvalda sem mun fara fram í samstarfi við íbúa.

„Íbúaþátttaka og samtal stjórnvalda við framtíðaríbúa verður hornsteinn endurreisnar byggðar í Grindavík,“ segir í tilkynningunni.

Fréttin var uppfærð með nýrri mynd og fyrirsögn.