Hernaðaraðstoð frá Bandaríkjunum farin að berast Úkraínu á ný

Sæki samantekt...

Bandaríkin eru aftur byrjuð að veita Úkraínu hernaðaraðstoð og deila með þeim leyniþjónustu upplýsingum. Slík aðstoð var fryst eftir fund Volodymyrs Zelenskys Úkraínuforseta með Donald Trump Bandaríkjaforseta og J.D. Vance varaforseta í Hvíta húsinu í lok febrúar.

Hernaðaraðstoð flutt um Pólland til Úkraínu

Utanríkisráðherra Póllands, Radoslaw Sikorski, staðfesti eftir fund með utanríkisráðherra Úkraínu, Andrii Sybiha, í dag, að hernaðaraðstoð frá Bandaríkjunum sé aftur farin að berast Úkraínu, hún sé flutt í gegnum Pólland. Þá virki Starlink, samskiptanet í eigu SpaceX, fyrirtækis Elon Musks, sem Úkraínuher hefur nýtt sér.

Bíða upplýsinga frá Bandaríkjamönnum

Stjórnvöld í Rússlandi bíða nánari upplýsinga frá Bandaríkjastjórn um skilmála 30 daga vopnahlés í Úkraínu. Þetta sagði Dmitry Peskov, talsmaður Kreml, við fjölmiðla í morgun. Peskov segir að nú sé verið að lesa vandlega yfir yfirlýsingar eftir fund Úkraínu og Bandaríkjanna í Sádí-Arabíu í gær.

Dmitry Peskov, talsmaður stjórnvalda í Rússlandi ásamt Vladimír Pútín, Rússlandsforseta. EPA-EFE/SERGEI ILNITSKY

Eftir fundinn lýsti Marco Rubio, utanríkisráðherra Bandaríkjanna, því yfir að nú væri boltinn hjá Rússum. Trump ætlar að ræða við Pútín Rússlandsforseta í vikunni um skilmála vopnahlésins.