Hitinn gæti náð 20 stigum

Sæki samantekt...

Hlýtt loft verður yfir landinu næstu dagana. Hiti gæti náð allt að 20 stigum, segir veðurfræðingur.

Birgir Örn Höskuldsson, veðurfræðingur á Veðurstofu Íslands, segir að í dag verði bjart og fallegt veður víðs vegar um landið þar sem hitinn mun skríða yfir tíu stigin á nokkrum stöðum en á morgun og á sunnudag mun súld eða rigning verða viðloðandi á suður- og vesturhelmingi landsins.

„Það er hæð austur af landinu við Færeyjar sem er að fikra sig í áttina að Bretlandseyjum og hún mun dæla til okkar sunnanáttum með hlýju lofti langt sunnan úr höfum,“ segir Birgir við mbl.is.

Hann segir að á morgun og á sunnudag muni hámarkshitinn á Norður- og Austurlandi fara yfir 15 stig og eins og spáin líti út núna þá gæti hitinn náð allt að 20 stigum í upphafi næstu viku.

„Það er ekkert útilokað að hitinn nái 20 stigum fyrir norðan og austan en það þarf ýmislegt að ganga upp til að svo verði. Eigum við ekki að segja að miði sé möguleiki,“ segir Birgir. Hann segir ólíklegt að hitamet í apríl verði slegin.

Veðrabrigði um miðja næstu viku

Trausti Jónsson veðurfræðingur vekur athygli á hitameti á fyrri hluta aprílmánaðar á bloggsíðu sinni, Hungurdiskum.

Þar kemur fram að hæsta hitatala fyrri hluta mánaðarins sé 21,2 stig sem hafi mælst í Neskaupstað 3. apríl árið 2007 og þá hafi hitinn farið yfir 20 stig á Skjaldþingsstöðum 9. apríl 2011.

Birgir segir að líklega verði veðrabrigði eftir miðja næstu viku en hvort hiti verði þá í meðallagi eða von sé á kuldakasti, verði að koma í ljós.