Líkur á samdrætti í BNA

Sæki samantekt...

Hafsteinn Hauksson aðalhagfræðingur Kviku segir að það komi sér ekki á óvart að sjá að greiningaraðilar séu farnir að taka möguleikann á samdrætti í Bandaríkjunum alvarlega. Væntingakannanir meðal bæði heimila og fyrirtækja í Bandaríkjunum benda til vaxandi svartsýni á fyrstu mánuðum ársins, en það tengist bæði áformum um tolla og niðurskurð opinberra útgjalda, sem óttast er að komi niður á efnahagsumsvifum þegar líður á árið.

„Margir greiningaraðilar treystu á að tollaáform Trumps yrðu fyrst og fremst samningatæki, og töldu að tollum yrði að endingu beitt tiltölulega hnitmiðað að löndum á borð við Kína, eða til að verja innlendan bílaiðnað, sem forsetanum er sérstaklega umhugað um. Hins vegar hefur komið í ljós að bandarísk stjórnvöld eru reiðubúin að ráðast í víðtækari tollheimtu, og virðast jafnframt tilbúin að þola stærra bakslag á hlutabréfamörkuðum og í efnahagslífinu á meðan tollastefnunni er komið til framkvæmda en bandarískir atvinnurekendur höfðu vonast til,“ segir Hafsteinn.

Snúið að gera áætlanir

Hann bætir við að það sé ekki síður óvissa um tollana sem hafi verið dragbítur, en framkvæmd tollastefnunnar hefur enn sem komið er einkennst af ákveðnu ístöðuleysi; tollar á Mexíkó og Kanada voru til dæmis lagðir á og aflétt á víxl. Hann segir það mjög snúið fyrir fyrirtæki að gera áætlanir og bregðast við þegar fyrirsjáanleiki er lítill, svo hættan er sú að þau haldi frekar að sér höndum og bíði með ráðningar og fjárfestingar þar til óvissu er eytt. Það geti leitt mjög hratt til kólnunar í hagkerfinu, eins og hátíðnivísbendingar benda raunar til á fyrsta fjórðungi ársins.

„Það er samt ekki sjálfgefið að hagkerfið endi í samdrætti, enda eru undirstöður bandaríska hagkerfisins að ýmsu leyti traustar. Það er enn góður uppgangur í fjárfestingum tengdum gervigreindarvæðingu, vinnumarkaður hefur haldist sterkur og skuldsetning í einkageiranum er almennt lítil. Þess vegna er í raun enn grátlegra að stjórnvöldum í Bandaríkjunum hafi ekki tekist betur að spila úr þessari sterku stöðu en svo að það sé nú rætt í fullri alvöru um að hagkerfið geti farið í samdrátt á árinu,“ segir Hafsteinn.