Ríkisstjórnarsamstarfið: Eins og mörg slæm fyllerí í röð

Sæki samantekt...

Hætt er við því að það myndist ákveðið Þol hjá almenningi gagnvart síendurteknum hneykslismálum sem skekið hafa ríkisstjórn Kristrúnar Frostadóttur. Þetta er mat Diljár Mistar Einarsdóttur, þingmanns Sjálfstæðisflokksins.

Hún er gestur Spursmála að þessu sinni ásamt Snorra Mássyni, þingmanni Miðflokksins. Þar ræða þau stöðu ríkisstjórnarinnar í ljósi nýjasta málsins sem reynt hefur á ríkisstjórnina — afsögn Ásthildar Lóu Þórsdóttur.

Orðaskiptin um þessi mál má sjá í spilaranum hér að ofan en einnig eru þau rakin í textanum hér að neðan.

Segjast ætla að sitja að völdum í 8 til 12 ár

„Þetta er alltaf heildarmynd. Á einhverjum tímapunkti myndi maður vona að það sé eitthvað sem muni fylla mælinn. Þegar Samfylkingin hefur samt uppi stór orð manna á millum að þetta sé bara fyrsta árið af átta árum eða tólf við stjórnvölinn. Þess vegna eru þau komin með þetta fína þingflokksherbergi. Ef menn eru með slíkar hugsjónir þá þurfa þeir kannski að fara að hugleiða að mynda einhverja sjálfbærari samstarfsheild inni í þinginu sem þau geta treyst að sé að vinna að málunum en sé ekki hreinlega að skandalísera.“

„Það koma upp þessi eins og við höfum farið yfir hneykslismál sem við höfum farið yfir, trekk í trekk. Það er stóra Nike-skóa málið, það eru ummæli um dómstóla, það eru ummæli um fjölmiðla, það er þetta nýlegasta málið sem er stóra biðlaunamálið, varasjóður heimilanna og svo bætist þetta við.“

Styrkir til Flokks fólksins sem búið er að hvítþvo algjörlega í fjármálaráðuneytinu.

„Það er búið að kyngja ansi mörgu,“ skýtur Snorri inn í.

Og Diljá bætir við:

„Já, er það ekki hættan? Maður hugsar, dropinn hlýtur að fylla mælinn, eða myndast bara ákveðið þol. Fólk sem fer á mörg slæm fyllerí í röð. Þetta jafnast bara út og svo er það bara afréttari daginn eftir og allt fallið í ljúfa löð. Maður hefur líka áhyggjur af því.“

Og Snorri veltir vöngum yfir stöðu Viðreisnar og hvernig því fólki sem fer fyrir flokknum hljóti að líða.

„Ef maður setur sig í spor Viðreisnar. Þá er þetta fólk sem vill fara inn og vinna að ákveðnum verkefnum en það er sífellt verið að sprengja áform fólks í loft upp því auðvitað vilja þau fá umræðu í samfélaginu um þau mál sem þau eru að vinna að. Þau eru náttúrulega að reyna að troða okkur inn í þetta erlenda ríkjasamband. Þau myndu vilja hafa það í forgrunni en ekki Nike skó eða hvað er í málinu. Þetta hlýtur að þreyta fólk en þá er spurning á hvaða tímapunkti ráðherrastóllinn er farinn að hlýja fólki og mikið.“

Viðtalið við Snorra og Diljá má sjá og heyra í heild sinni í spilaranum hér að neðan: