Segir menntamálaráðherra grafa undan dómskerfinu

Sæki samantekt...

Áslaug Arna Sigurbjörnsdóttir, þingmaður Sjálfstæðisflokksins, segir óásættanlegt að Ásthildur Lóa Þórsdóttir, mennta- og barnamálaráðherra, skuli grafa undan dómskerfinu með ummælum sínum.

Áslaug vísar þar í orð Ásthildar Lóu þess efnis að hún sé „löngu hætt að gera ráð fyrir réttlæti hjá íslenskum dómstólum“.

Ummælin lét Ásthildur Lóa falla eftir að Héraðsdómur Reykjavíkur úrskurðaði henni í óhag í máli hennar gegn sýslumanninum á höfuðborgarsvæðinu. Ásthildur og eiginmaðurinn hennar höfðuðu málið vegna ágreinings sem tengdist nauðungaruppboði á heimili hennar árið 2017.

Áslaug Arna, sem var dómsmálaráðherra frá 2019–2021, segir í færslu á Facebook að ummælin grafi undan trausti almennings á réttarkerfinu og sýni lítilsvirðingu fyrir sjálfstæði dómstóla. Það sé ekki aðeins óábyrgt heldur beinlínis hættulegt.