Afsláttur bankans til Ásthildar Lóu skattskyldur

Sæki samantekt...

Sigurður G. Guðjónsson hæstaréttarlögmaður segir það blasa við að sú eftirgjöf frá markaðsvirði sem Arion banki veitti Ásthildi Lóu Þórsdóttur við sölu á fasteign árið 2019 sé tekjuskattsskyld.

Vísar hann þar til máls sem komst í hámæli fyrir skemmstu þegar héraðsdómur felldi dóm í máli sem Ásthildur Lóa og maður hennar höfðuðu gegn sýslumanni vegna meints tjóns sem þau hefðu orðið fyrir vegna málsmeðferðar sýslusmanns við nauðungarsölu á eign þeirra.

Margra ára málavafstur

Forsaga málsins var sú að Arion banki hafði leyst til sín húseign sem þau hjónin keyptu árið 2007. Gerðist það eftir mikið vafstur og mörg ár þar sem þau bjuggu í húsinu án þess að greiða af lánum sem á því hvíldu.

Málinu lauk með því að Arion banki seldi þeim húsið aftur á 55 milljónir króna. Sömu fjárhæð og þau höfðu greitt fyrir eignina 12 árum fyrr.

Sigurður Guðni fer yfir málið á vettvangi Spursmála ásamt Árna Helgasyni, lögmanni og varaþingmanni Sjálfstæðisflokksins. Þar bendir Árni á að markaðsverð hússins hafi verið tugum milljóna króna hærra árið 2019 en sem nam söluverðinu.

Sigurður bendir á að slík ívilnun sé tekjuskattsskyld og að greiða beri af mismuni kaupverðs og markaðsverðs. Þá muni Skatturinn, ef allt er eðlilegt, krefja þau sem nutu mismunarins um álag. Það er algengt 25% í málum sem þessum.

Orðaskiptin um þetta má sjá í spilaranum hér að ofan en þau eru einnig rakin í textanum hér að neðan:

Einstakt mál

Sigurður, þú hefur komið að mörgum flóknum úrlausnarmálum í eftirleik hrunsins, veit ég og beggja vegna borðs, bæði hjá skuldurum og lánardrottnum. Hvernig horfir þetta mál við þér þegar þú rekur þig í gegnum þetta og þessa dóma?

„Þetta er held ég einstakt mál. Ég man ekki eftir því að nokkur af þeim skjólstæðingum sem ég var að vinna fyrir hafi getað fengið svona díl eins og barnamálaráðherrann fékk. Þ.e. að fá að kaupa eign til baka á 12 ára gömlu verði. Bankarnir hafa alltaf verið harðir á því, vegna þess að þeir hafa ekki viljað mismuna viðskiptavinum sínum eða skuldurum, þá vilja þeir bara að markaðurinn ráði því verði sem þú þarft að greiða fyrir eignina ef þú ætlar að fá hana aftur.“

Skatturinn skoði málið

Segir Sigurður að bankinn þurfi að skýra málið nánar og að Skatturinn hljóti að taka það fyrir einnig.

„Þannig að auðvitað þarf Arion banki að svara því hvort það hafi verið vegna þess að hún var orðin þingmaður, sem hafði þess vegna ákveðið vald. Var verið að misnota valdið sem þingmaður til þess að ná fram hagstæðum kjörum í viðskiptum við banka? Það liggur fyrir að þetta var keypt á mjög hagstæðu verði og þá er bara ákvæði í skattalögunum og þá hlýtur Skatturinn miðað við það sem hann hefur verið að gera gagnvart öðru fólki, nú er þetta bara upplýst, að skoða skattskil þessara hjóna og þau hljóta að þurfa að telja sér til tekna mismuninn á kaupverðinu og þekktu markaðsverði á svona fasteignum á þeim tíma þegar þessi viðskipti áttu sér stað. Það bara getur ekki annað verið.“

Er þetta tekjuskattsskylt?

„Þetta er tekjuskattsskylt.“

Er það bara augljóst?

„Já. Það er bara ákvæði 57. greinar tekjuskattslaganna sem fjallar um óeðlilegt verð í viðskiptum. Og það er bara hægt að færa þá auknar tekjur til samræmis við það sem er talið markaðsverð á viðkomandi hlut.“

Og þú telur þá að skatturinn muni skoða þetta og það er þá mismunurinn á þessu 12 ára gamla verði og markaðsverðinu…

„Já, sem er tekjuskattsskyldur.“

Jafnvel tugir milljóna í skatt

Það gætu þá verið allmargar, jafnvel tugir milljóna króna?

„Já, já. Ef svona hús er kannski komið á 90 milljónir þegar þau eru að kaupa það á 55 þá eru það þarna einhverjar 40 milljónir sem eru bara tekjuskattur tekinn af. 48% eitthvað svoleiðis. Svo er sett á mann álag. Þannig að þetta er ekki gott mál en það væri mjög sérstakt ef þetta fólk sem er alltaf að kalla eftir jafnrétti og að allir fái sömu meðhöndlun hjá stjórnvöldum ef það ætlar svo, eða nýtur þess „in the end“ að borga ekki skatt af gjöf, sem er úr hófi.“

Viðtalið við Sigurð Guðna og Árna Helgason má sjá í heild sinni í spilaranum hér að neðan: