Vill heimila fækkun fulltrúa í borgarstjórn

Sæki samantekt...

Fram er komið á Alþingi frumvarp sem kveður á um afnám þeirrar lagaskyldu sem mælir fyrir um að í sveitarfélagi þar sem íbúar séu fleiri en 100 þúsund talsins, skuli fjöldi sveitarstjórnarmanna vera 23 hið fæsta, en 31 að hámarki.

Þetta ákvæði á einungis við um Reykjavík, enda ekkert annað sveitarfélag þar í námunda hvað fólksfjölda varðar. Það er Sigríður Á. Andersen alþingismaður Miðflokksins sem er fyrsti flutningsmaður frumvarpsins, en auk hennar eru fjórir þingmenn flokksins meðflutningsmenn.

Þá segir í frumvarpinu að í sveitarfélögum þar sem íbúar eru fleiri en 50 þúsund geti fjöldi aðalmanna í sveitarstjórn verið 15 til 23.

„Sveitarfélög um allt land eru að horfa til hagræðingar og hljóta auðvitað að líta til þessa þáttar, eins og annarra, þ.e. að fækka sveitarstjórnarfulltrúum og verða að hafa svigrúm til þess. Eins og staðan er í dag hefur Reykjavíkurborg ekki slíkt svigrúm,“ segir Sigríður í samtali við Morgunblaðið.

„Það eru 23 borgarfulltrúar og átta varaborgarfulltrúar á fullum launum við borgarstjórn. Það er fáheyrður fjöldi í samanburði við stærri borgir,“ segir hún og nefnir að borgarstjórn eigi ekki að geta skýlt sér á bak við þá niðurnjörvun sem lögin mæla fyrir um, enda hafi Alþingi enga sérstaka skoðun á málinu.

„Engin ástæða er til að löggjafinn þvingi borgaryfirvöld til slíkrar fjölgunar og er því lagt til að heimilt verði að borgarfulltrúar verði 15,“ segir í greinargerð frumvarpsins.

„Mikilvægt er að sveitarfélög hafi sjálfdæmi um fjölda sveitarstjórnarmanna. Þróunin hefur verið í átt til fækkunar sveitarstjórnarmanna en ekki fjölgunar. Mikilvægt er að löggjöf hindri ekki nauðsynlega hagræðingu að því leyti,“ segir þar einnig.

Lesa má meira um málið í Morgunblaðinu í dag og í nýja Mogga-appinu