Þingmenn Viðreisnar vilja rýmka lög um mannanöfn

Sæki samantekt...

Þingmenn Viðreisnar hafa lagt fram frumvarp um breytingar á mannanafnalögum sem miðast að því að hægt verði að taka upp ættarnöfn í frekari mæli. Þá yrði heimild veitt til að taka upp svokölluð eftirnöfn sem kenninöfn að ákveðnum skilyrðum uppfylltum.

Jón Gnarr þingmaður Viðreisnar er flutningsmaður frumvarpsins.

Samkvæmt því yrði meðal annars hægt að taka upp nýtt kenninafn án þess að eiga eiginlegt eða huglægt tilkall til sérstaks ættarnafns.

Í frumvarpinu segir að fyrir því gætu legið ótal persónulegar og menningarlegar ástæður, til að mynda að einstaklingar vilji kenna sig við sérstakan stað, líkt og fordæmi séu fyrir með nöfn á borð við Reykfjörð eða Laxness.

Færi svo að eftirnafn yrði nýtt af þremur kynslóðum samfleytt myndi það teljast sem ættarnafn og yrði fært á mannanafnaskrá.

Í frumvarpinu segir að það skjóti óneitanlega skökku við að meðan ný íslensk ættarnöfn séu bönnuð séu sum algengustu ættarnöfn á landinu af erlendum stofni.

Önnur tillaga frumvarpsins snýr að heimild mannanafnanefndar til að samþykkja nöfn sem óskað er eftir. Þá yrði henni heimilt að samþykkja nöfn eða nafnabreytingar séu fyrir því persónulegar eða menningarlegar ástæður. Þar er nefnt sem dæmi að einstaklingur vilji heiðra uppruna sinn, til dæmis með breytingu ritháttar, eða taki upp nýja lífsskoðun eða trú.