Blakparið segir móttökurnar hafa verið hlýjar í köldu landi

Sæki samantekt...

Paula Del Olmo Gomez og Miguel Mateo Castrillo fluttu norður á Akureyri árið 2018 og hafa síðan þá verið allt í öllu í blakdeild KA. Bæði eru þau leikmenn meistaraflokks, þjálfa yngri flokka félagsins og Mateo sér um þjálfun meistaraflokks kvenna. Fyrr í mánuðinum urðu þau svo bæði bikarmeistarar með sínum liðum.

Blakdeild félagsins hefur stækkað ört í höndum Paulu og Mateo. „Fjöldi iðkenda í yngri flokkum hefur fimm — ef ekki sexfaldast,“ segir Mateo. Paula segist fyrst um sinn hafa verið að þjálfa tíu krakka í heildina í yngri flokkum félagsins en nú sé KA með fjölda liða í hverjum flokki.

Móttökurnar á Neskaupsstað voru hlýjar þótt kalt hafi verið

Þau fluttu frá Spáni árið 2017 þegar þeim bauðst að spila fyrir Þrótt í Neskaupsstað. „Þú veist að þú ert að fara í algjört myrkur og það er bara einn vegur í gegnum þennan bæ,“ sagði bróðir Mateo við hann áður en hann ákvað að flytja til landsins. Þau lýsa hins vegar góðum viðtökum í Neskaupsstað. „Það var mjög góð upplifun að koma, það tóku allir svo vel á móti okkur. Þetta er lítið samfélag og því er mikill samgangur milli fólks. Okkur var boðið í mat, siglingar og snjósleða. Við gerðum fjölbreytta hluti, fólk tók svo vel á móti okkur.“

„Það eru allir svo hlýir á þessum kalda stað.“

Þeim gengur vel að læra íslenskuna

„Þetta gengur bara vel, ég lærði íslensku í Covid í einkakennslu. Það var mjög gott fyrir mig að læra íslensku þannig. Mér líður mjög vel að tala íslensku en ég er þó ekki alveg hundrað prósent ég sjálf, því það er svo erfitt að tala alveg rétt.“ Paula starfar einnig í Naustaskóla og segir það hjálpa mikið við að læra tungumálið að vera í samskiptum við krakkana í skólanum. Þar sé hún óhrædd við að gera mistök og segir nemendur og kennara hjálpsöm.

Mateo starfar sem sjúkraþjálfari og segist reyna sitt besta við að tala íslensku við skjólstæðinga. Á æfingum leitast hann við að tala íslensku við iðkendur.