Dregur úr skjálftavirkni eftir öflugan skjálfta í gærkvöldi

Sæki samantekt...

Jarðskjálftavirkni á Reykjanesskaga hélt áfram í nótt en hefur farið minnkandi frá fyrri dögum. Frá þessu er greint í tilkynningu frá náttúruvárvakt Veðurstofu Íslands.

Í henni segir að virknin sé nokkuð jafndreifð um kvikuganginn, frá Stóra Skógfelli í suðri og norður fyrir Keili. Dýpi skjálfta er enn þá nokkuð stöðugt, eða á milli 4 og 6 kílómetrar.

Um klukkan 17:30 í gær, 3. apríl, hófst kröftug hrina gikkskjálfta við Trölladyngju norðvestan við Kleifarvatn. Stærsti skjálftinn sem mældist var 3,9 að stærð rétt fyrir klukkan 23 en alls mældust 5 skjálftar yfir 3 að stærð síðan hrinan hófst klukkan hálf sex.

Fjölmargar tilkynningar bárust Veðurstofunni um að skjálftarnir hefðu fundist í byggð. Eftir miðnætti hefur hægt og bítandi dregið úr fjölda gikkskjálfta á svæðinu.