Fall ráðherra: Hvað gerðist dagana fyrir afsögn?

Sæki samantekt...

Ásthildur Lóa Þórsdóttir sagði af sér sem barna- og menntamálaráðherra eftir að í ljós kom að hún hefði haft samræði við dreng þegar hún var 22 ára gömul. Upphafið að endinum í ráðherrastólnum hófst ellefu dögum fyrir afsögn.

Í kjölfar afsagnar hennar hafa vaknað upp spurningar um það af hverju Kristrún Frostadóttir aðhafðist ekkert í viku um þetta mál þrátt fyrir að hafa vitneskju um það.

Einnig hafa stjórnarandstöðuþingmenn sagt að rannsaka þurfi málið vegna mögulegs trúnaðarbrests forsætisráðuneytisins. Er það ásökun sem Kristrún hafnar alfarið.

Ásthildur og Kristrún tvísaga

9. mars kemur beiðni um fimm mínútna fund frá Ólöfu Björnsdóttur, fyrrverandi tengdamóður barnsföður Ásthildar, með tölvupósti til forsætisráðuneytisins. Ekki var tekið fram hvert efni fundarins er.

11. mars er ítrekuð beiðni um fund af hálfu Ólafar með tölvupósti.

„Góðan daginn, ég bið um stuttan fund með Kristrúnu Frostadóttur, en það varðar Ásthildi Lóu Þórsdóttur, það er í góðu lagi að hún sitji líka fundinn, ef Kristrún vill það. Liggur á,“ segir í póstinum.

Sama dag ber aðstoðarmaður Kristrúnar nafn Ólafar undir Ásthildi, en Kristrún sagði ítrekað á blaðamannafundinum í dag að erindið væri trúnaðarmál. Er aðstoðarmaðurinn bar nafnið undir Ásthildi þá kvaðst hún ekki kannast við konuna.

Þarna ber sögum Ásthildar og Kristrúnar ekki alveg saman því að forsætisráðherra hefur sagt að aðstoðarmaður sinn hafi haft samband við aðstoðarmann Ásthildar, en ekki Ásthildi.

Samkvæmt forsætisráðuneytinu fóru ekki frekari samskipti fram á milli ráðuneytanna, ráðherra og aðstoðarmanna um þetta mál eftir 11. mars.

Frétti af framferði Ásthildar 13. mars: Hafnaði fundi

13. mars berst forsætisráðuneytinu tölvupóstur um málavexti og erindi fundarins þar sem fram kemur saga Ásthildar með drengnum. Kristrún staðfesti á blaðamannafundi í gær að hún hefði séð málavexti þennan dag.

14. mars spurði Ólöf forsætisráðuneytið hvenær málið yrði tekið fyrir og þá fékk hún svar frá ritara forsætisráðherra um að þau hefðu þegar tilkynnt henni fyrr um morguninn að hún myndi ekki fá fund með forsætisráðherra.

Það tók því innan við sólarhring fyrir forsætisráðuneytið að hafna beiðni Ólafar um fund eftir að hafa fengið að heyra af málavöxtum.

Sunnudaginn 16. mars ákveður Ásthildur að hafa samband við Ólöfu klukkan 15.59. Þá voru fimm dagar liðnir síðan hún hafði fengið veður af nafni Ólafar, sem hún kannaðist ekki við.

Þessa fimm daga hafði hún ekki samband við Ólöfu og því velta margir því fyrir sér hvað gerðist frá 11. mars til 16. mars sem olli því að Ásthildur ákvað að taka upp símann og hringja í konu sem hún þekkti ekki vegna fundar sem forsætisráðherra hafði verið beðinn um, ekki Ásthildur.

Erindið barst ráðuneytinu í millitíðinni

Það sem við vitum að gerðist í millitíðinni er að 13. mars barst forsætisráðuneytinu málavexti og hafa stjórnarandstöðuþingmenn kallað eftir því að rannsakað hvort að þarna hafi verið trúnaðarbrestur í forsætisráðuneytinu.

Það er, hvort að Kristrún eða aðstoðarmenn hennar hafi komið áleiðis efnistökum bréfsins 13. mars til Ásthildar. Kristrún hefur ítrekað hafnað því.

17. mars reyndi Ásthildur að ná tali af Ólöfu, samkvæmt viðtali í Kastljósi í fyrrakvöld, og svo reyndi hún að hringja í þrígang í Ólöfu 18. mars. Ekki tókst að ná sambandi við hana og því ákvað Ásthildur að mæta heim til hennar þar sem eiginmaður Ólafar ræddi við Ásthildi.

Hinn 19. mars hringir Ólöf í Ásthildi Lóu, að sögn Ásthildar, og þar spyr Ásthildur hana hvort hún ætli með málið í fjölmiðla. Samkvæmt Ásthildi þá sagði Ólöf svo ekki vera.

Ráðherra segir af sér

Kristrún sagði á blaðamannafundinum á fimmtudaginn að fyrr um daginn hefði hún fengið staðfest sannleiksgildi erindisins sem henni barst 13. mars fyrir tilstuðlan fjölmiðla.

Kristrún fundaði þann dag með Ásthildi Lóu, Þorgerði Katrínu Gunnarsdóttur og Ingu Sæland og niðurstaða fundarins var sú að Ásthildur myndi segja af sér.

Ríkisútvarpið birti frétt klukkan 18 í fyrrakvöld þar sem fram kom að Ásthildur hefði átt barn með dreng sem hún kynntist í trúarsöfnuði. 35 mínútum síðar greindi RÚV frá því að Ásthildur hefði sagt af sér.

Margt enn óljóst

Ekki er ljóst af hverju Kristrún aðhafðist ekki í málinu í viku fyrr en fjölmiðlar höfðu samband við hana á fimmtudaginn. Hún sagði á blaðamannafundinum í gær að forsætisráðuneytinu bærust mörg mál á hverjum degi og að mál tækju sinn tíma innan stjórnsýslunnar.

Þá er einnig ekki augljóst af hverju Ásthildur beið í fimm daga með að hafa samband við konu sem hún kannaðist ekki við. Ásthildur sagði í yfirlýsingu sinni í gær að hún hafi verið forvitin og því leitað að Ólöfu á Facebook.

Þar hafi hún tekið eftir því að barnsföður sinn og Ólöf væru vinir á facebook. Samkvæmt henni þá vissi hún ekkert hver tengsl barnsföðurins og Ólafar væru en að hana grunaði um hvað málið snerist, og því vildi hún hafa samband við hana.

Ekki er ljóst hvaða dag hún byrjaði að skoða heimasíðu Ólafar á Facebook og því ekki ljóst hvort að hún hafi gert það áður en forsætisráðuneytinu barst erindið 13. mars eða eftir að ljóst var um hvað málið snerist.