Finnar vilja út úr jarðsprengjubanni

Sæki samantekt...

Finnland mun á næstunni draga sig úr Ottawa-samkomulaginu um bann við jarðsprengjum og er það liður í breyttum landvörnum í ljósi útþenslustefnu Rússlands.

Samhliða þessu verður mikil áhersla lögð á uppbyggingu heraflans og endurnýjun vopnakerfa.

Til að fjármagna það munu þrjú prósent af landsframleiðslu renna til varnarmála fyrir árið 2029, en Finnar verja nú 2,4 prósentum til málaflokksins.

Samkomulagið var fyrst undirritað á alþjóðaráðstefnu í Ottawa í Kanada árið 1997 og kveður á um bann við notkun, geymslu, framleiðslu og flutningi á jarðsprengjum sem beint er gegn fólki.

Síðan þá hafa alls 165 ríki heims undirritað samkomulagið eða heitið því að vinna að markmiðum þess. Bandaríkin, Rússland, Kína og flest ríki Mið-Austurlanda eru ekki aðilar að jarðsprengjubanninu.

Moskva ógnar ríkjum Evrópu

Árásarstríð Moskvuvaldsins í Úkraínu og endurteknir stríðsglæpir hersins hafa ýtt við Evrópu og kynt undir þörf fyrir öflugri herafla þar. Fleiri ríki hafa þegar lýst því yfir að þau muni á næstunni segja sig úr Ottawa-samkomulaginu, þ.e. Pólland, Eistland, Lettland og Litáen.

Ekki er útilokað að enn fleiri ríki Evrópu fari sömu leið áður en langt um líður.

Finnland, sem jafnframt er aðildarríki að Atlantshafsbandalaginu (NATO), á 1.340 kílómetra löng landamæri að Rússlandi.

Hernaðarsérfræðingar telja ljóst að jarðsprengjubelti verði lagt við landamærin til að hægja á hugsanlegri innrás Rússlandshers, en fyrir eru víða við landamærin skriðdrekahindranir og skurðir.

Ný herkvaðning í Rússlandi

Rússlandsforseti hefur gefið skipun um að fjölga í heraflanum um 160 þúsund manns. Flestir þessara manna verða sendir í landhersveitir og á fjölgunin að raungerast fyrir 15. júlí nk.

Er þetta fjölmennasta herkvaðning þar í landi frá upphafi árásarstríðsins í Úkraínu.

Búast má við því að framtíðarhermenn Rússlands verði karlmenn á aldrinum 18–30 ára og líklega munu þeir koma frá afskekktum og fátækum svæðum, s.s. Síberíu.