Fyrstur Íslendinga til að gegna svo háu embætti

Sæki samantekt...

Almar Ögmundsson var á dögunum kjörinn einn af þremur varaforsetum Evrópska hnefaleikasambandsins. Eru þetta mikil tímamót í alþjóðlegu samstarfi Íslands á sviði hnefaleika en þetta er í fyrsta sinn sem Íslendingur gegnir svo háu embætti innan evrópskra hnefaleikasamtaka.

Almar hefur verið virkur í þróun og uppbyggingu hnefaleika á Íslandi og Evrópu síðustu ár. Hann var formaður hnefaleikasambandsins á árunum 2020–2022 en hefur að eigin sögn verið meira bak við tjöldin síðustu tvö ár.

Í nýju hlutverki sínu í framkvæmdastjórn mun hann hafa beint aðgengi að stefnumótun og ákvarðanatöku um framtíð hnefaleikaíþróttarinnar í Evrópu.

Spilling í Alþjóðahnefaleikasambandinu

Í samtali við mbl.is segir Almar spillingu í Alþjóðahnefaleikasambandinu hafa orðið til þess að hnefaleikum var hent út úr Ólympíusambandinu.

„Það var í rauninni hætta í mörg ár á að hnefaleikum yrði hent út úr Ólympíusambandinu en það var alltaf gefinn ákveðinn séns, að breyta um stjórn til dæmis. En starfsemin var ekki eins og hún á að vera og Ólympíusambandinu þótti nóg komið. Það er því miður oft mikil spilling í alþjóðlegum íþróttasamböndum.“

Í kjölfar þess segir hann mikla vinnu hafa verið lagða í að stofna nýtt alþjóða hnefaleikasamband, sem var gert árið 2023. Fyrir rúmum tveimur vikum var síðan staðfest að hnefaleikar yrðu hluti af Óympíuleikunum í LA 2028.

„Hluti af því að stofna nýtt alþjóðasamband er að stofna Evrópudeild, Asíudeild og aðrar álfudeildir,“ bætir Almar við.

Fulltrúar 23 landa komu saman í Prag

Tékkneska hnefaleikasambandið og borgin Prag boðuðu til fyrsta aðalfundar hins nýstofnaða Evrópska hnefaleikasambands, þar sem fulltrúar 23 landa komu saman og staðfestu formlega stofnun sambandsins.

Ísland átti tvo fulltrúa á fundinum, þá Almar Ögmundsson og Jón Birki Lúðvíksson.

Kosning framkvæmdastjórnar fór fram á fundinum og var Lars Brovil frá Danmörku kjörinn fyrsti forseti sambandsins.

Markar þetta upphaf nýrrar stefnu og aukins samráðs innan evrópskra hnefaleika.

„Maður gerir það ekki á hverjum degi“

Hvernig kom það til að þú bauðst þig fram?

„Ég hef verið í þessu undanfarin ár og verið í góðu sambandi við fólk erlendis. Sá sem var að leiða þessa vinnu, að stofna þetta samband, er frá Danmörku og hann hafði samband við mig og spurði hvort ég gæti aðstoðað starfsstjórnina. Í kjölfar þess taldi ég rétt að bjóða mig fram í fyrstu formlegu stjórnina.“

Hvernig er tilfinningin, að vera kjörinn fyrstur Íslendinga í svona háa stöðu á alþjóðlegum vettvangi?

„Það er bara spennandi. Mikil vinna en mjög skemmtilegt verkefni að byggja upp svona nýtt alþjóðasamband frá grunni, maður gerir það ekki á hverjum degi,“ svarar Almar. Aðspurður bætir hann við að nýrri stöðu muni fylgja einhver ferðalög.

„Þessu munu klárlega fylgja einhver ferðalög, einhverjir fundir og mót og svona sem þarf að fylgjast með, en þetta er allt bara sjálfboðastarf þeirra sem eru í stjórninni.“

Ertu sjálfur að keppa?

„Það er nú orðið svolítið síðan ég keppti síðast. Ég keppti nú ekki nema kannski 10 sinnum, svo var ég í námi og öðru. Þetta er góð leið til að geta verið áfram í þessu umhverfi án þess að vera að fara inn í hringinn.“

Áhersla á samstöðu og samvinnu

Lars Brovil frá Danmörku var kjörinn forseti sambandsins. Auk Almars voru Marketa Haindlova frá Tékklandi og Len Huard frá Hollandi kjörin varaforsetar.

Meðstjórnendur eru Nicolina Juric frá Króatíu, Kirsi Korpaeus frá Finnlandi, Istvan Kovacs frá Ungverjalandi og Mouloud Bouziane frá Frakklandi.

Þá var dr. David McDonagh frá Noregi kjörinn formaður lækninga- og lyfjaeftirlitsnefndar, Martin Volke frá Þýskalandi formaður íþrótta- og keppnisnefndar og Enrico Apa frá Ítalíu fromaður dómara- og úrskurðarnefndar.

Lars Brovil, nýkjörinn forseti sambandsins, lagði áherslu í ávarpi sínu á fundinum á mikilvægi samstöðu og samvinnu innan Evrópu, og að nýja sambandið sé mikilvægur þáttur í stækkandi fjölskyldu World Boxing.

Evrópska hnefaleikasambandið stefnir að því að vinna náið með World Boxing, landsamböndum, ólympíunefndum og öðrum álfusamtökum til að tryggja gagnsæi, góða stjórnsýslu, þróun íþróttafólks og sjálfbæra fjármálastjórn.