Hlýnar í veðri en kólnar ört eftir sól­setur

Sæki samantekt...

Vaxandi hæðarsvæði teygir sig nú yfir landið, en lægðardrag á Grænlandshafi veldur suðaustankalda og smá vætu vestantil. Annars verður mun hægari vindi og bjartviðri.

Í hugleiðingum veðurfræðings á vef Veðurstofunnar segir að það muni hlýna í veðri og hiti verður á bilinu fjögur til níu stig yfir daginn. Það mun hins vegar kólna ört eftir sólsetur og því víða næturfrost.

„Um helgina verður hæðin væntanlega milli Íslands og Noreges og beinir til okkar sunnan- og suðaustanátt. Víða léttskýjað á Norður- og Austurlandi, en skýjað og lítilsháttar væta öðru hvoru sunnan- og vestantil og hlýnar heldur í veðri,“ segir á vef Veðurstofunnar.

Veðurhorfur á landinu næstu daga

Á föstudag: Suðaustan 5-13 m/s og skýjað við suður- og vesturströndina, en annars hægara og yfirleitt bjartviðri. Hiti 3 til 11 stig að deginum, hlýjast inn til landsins.

Á laugardag, sunnudag og mánudag: Suðaustan 8-15 m/s og súld eða rigning öðru hvoru, en hægara og víða léttskýjað á Norður- og Austurlandi. Hiti 4 til 13 stig, hlýjast norðaustantil.

Á þriðjudag: Gengur í allhvassa eða hvassa suðaustanátt með rigningu, en hægara og úrkomuminna norðaustantil. Milt veður.

Á miðvikudag: Útlit fyrir suðvestanátt með rigningu, en þurrt að kalla eystra og áfram milt.