Hefðu átt að slíta ríkisstjórnarsamstarfi „umtalsvert löngu fyrr“

Sæki samantekt...

Svandís Svavarsdóttir, formaður Vinstri grænna, segir samstarf síðustu ríkisstjórnar hafa í raun verið lokið 2023. „Í raun og veru þá hefðum við átt að vera búin að slíta því samstarfi umtalsvert löngu fyrr. Ég horfi nú oft til ársins 2023,“ sagði Svandís í samtali við Kristján Kristjánsson á Sprengisandi á Bylgjunni í dag.

Hún sagði stemninguna hafa verið horfna úr ríkisstjórninni um vorið 2023. Eftir það hafi samstarfið snúist meira og minna um hagsmuni þeirra flokka sem að stjórninni stóðu. Þá um haustið hafi verið reynt að hrista hópinn samann með ferð á Þingvelli. „Það gekk ekkert,“ sagði Svandís.

Stjórnarsamstarfið leið undir lok í október í fyrra. Þá tilkynnti Bjarni Benediktsson, þáverandi forsætisráðherra, að dagar stjórnarinnar væru taldir.

Hún sagði að fjarað hafi hratt undan flokknum í fyrra og flokkurinn lengi mælst undir 5% fylgi. Það er fylgið sem þarf til þess að fá jöfnunarsæti á Alþingi í þingkosningum. Eftir að Katrín Jakobsdóttir, þáverandi forsætisráðherra og formaður flokksins, ákvað að fara í forsetaframboð hafi flokkurinn ekki náð vopnum sínum að nýju.

„Það var stór partur af umræðunni að við værum dottin út og það er einhvern veginn erfitt að ná slagkrafti við það,“ sagði Svandís.