Staðfestir rétt fjölmiðla til að taka við og miðla upplýsingum

Sæki samantekt...

Stjórn Blaðamannafélags Íslands segir dóm Hæstaréttar í svokölluðu Brúneggjamáli vera mikilvæga staðfestingu á rétti blaðamanna til að taka við og miðla upplýsingum sem varða almenning. Þar sé einnig kveðið skýrt á um skyldu hins opinbera til að veita upplýsingar og skýra þær.

Hæstiréttur sneri við dómi Landsréttar sem dæmdi Matvælastofnun bótaskylda gagnvart eigendum Brúneggja fyrir að afhenda upplýsingar og vegna viðtala við starfsmenn stofnunarinnar.

Sigríður Dögg Auðunsdóttir, formaður Blaðamannafélagsins, segir að dómurinn taki afdráttarlaust af skarið um hlutverk fjölmiðla og rétt almennings til upplýsinga.

„Dómur Landsréttar var í rauninni svo mikið áfall, ekki bara fyrir stéttina heldur almenning og stjórnsýsluna. Maður fann eftir að hann féll að fólk hélt að sér höndum hvað varðar það að veita upplýsingar. Þar með skertist réttur almennings til upplýsinga verulega. Þetta er mikill léttir þessi dómur og mjög skýrt í honum hver skylda opinberra starfsmanna er gagnvart upplýsingalögum, gagnvart upplýsingabeiðnum fjölmiðla. Þeim er beinlínis skylt að afhenda upplýsingar sem eiga erindi til almennings.

Sigríður segir dóminn taka af öll tvímæli um heimild opinberra starfsmanna til að tjá sig um gögn sem þeir afhenda. Hann staðfesti þannig ekki aðeins upplýsingaskyldu stjórnvalda heldur líka rétt opinberra starfsmanna til að skýra þær.

„Það er nú yfirleitt bara þannig að það eru fjölmiðlar sem eru að upplýsa almenning um þessi mál og þar af leiðandi tekur þessi dómur af öll tvímæli um rétt fjölmiðla til að afla upplýsinga og það er mjög þröngt afmarkað hvenær stjórnsýslan hefur heimild til að synja beiðnum um upplýsingar.“