Orðrómarnir um Kamala Harris færast í aukana – Kom hún upp um sig á Óskarsverðlaunahátíðinni?

Sæki samantekt...

Kamala Harris tapaði stórt fyrir Donald Trump í forsetakosningunum í nóvember. Eftir það hefur verið frekar hljótt um hana og lítið hefur sést til hennar.

En nú færast orðrómar í aukana varðandi framtíðaráætlanir hennar á pólitíska sviðinu.

Politico segir að Harris íhugi alvarlega að bjóða sig fram sem ríkisstjóra í Kaliforníu. Segir miðillinn að í samkvæmi, í tengslum við Óskarsverðlaunahátíðina, hafi Harris sagt öðrum gesti að hún ætli að gefa sér tíma þar til í sumar til að taka endanlega ákvörðun um hvort hún bjóði sig fram. Politico hefur þetta eftir tveimur heimildarmönnum.

Er Harris sögð hafa sagt stuðningsfólki sínu, flokkssystkinum og fjölskyldu sinni, að hún muni taka ákvörðun innan nokkurra mánaða.

Ef Harris tekur slaginn um að verða eftirmaður núverandi ríkisstjóra, Gavin Newsom, og sigrar, þá verður hún fyrsta svarta konan til að gegna embætti ríkisstjóra í Bandaríkjunum. Sigur hennar myndi einnig „næstum örugglega“ útiloka að hún bjóði sig fram til forseta 2028 en hún er einnig sögð íhuga þann möguleika.