Óska eftir áliti almennings um málefni lífríkis

Sæki samantekt...

Stýrihópur um stefnumótunarvinnu um líffræðilega fjölbreytni leitar eftir áliti og ábendingum frá almenningi um málefni lífríkis á landi, í sjó og ferskvatni. Hópurinn hefur boðað til tveggja samráðsfunda um málið.

Fundirnir verða fjarfundir og getur fólk komið sjónarmiðum sínum á framfæri. Rætt verður hver séu brýnustu viðfangsefni er varða líffræðilega fjölbreytni. Meðal málefna sem óskað er ábendinga um eru tegundavernd, endurheimt raskaðra vistkerfa, áhrif mengunar og loftslagsbreytinga á lífríki og eyðing búsvæða á Íslandi.

Eitt brýnasta viðfangsefni umhverfismála

Jóhann Páll Jóhannsson, umhverfis-, orku- og loftslagsráðherra, sagði í aðsendri grein á Vísi um miðjan mánuð að varðstaða um líffræðilega fjölbreytni væri eitt brýnasta viðfangsefni umhverfismála í dag og áherslumál hjá nýrri ríkisstjórn.

„Vaxandi ásókn er í auðlindir og landrými fyrir margvíslegar athafnir. Þessu fylgir álag á lífríki og viðkvæm vistkerfi sem brýnt er að lágmarka eins og kostur er.“ Það sagði Jóhann Páll kalla á pólitískt frumkvæði og skýra stefnumörkun.

Fundirnir verða haldnir í gegnum fjarbúnað og má finna hlekki á þá á vef Stjórnarráðsins. Fundur um málefni lífríkis á landi verður haldinn 2. apríl og lífríkis í sjó og fersku vatni 9. apríl.