Segir ákall um breytingar: „Ég er klár í verkefnið“

Sæki samantekt...

Hildur Björnsdóttir, oddviti Sjálfstæðisflokksins í Reykjavík, kveðst hafa fundið fyrir miklum meðbyr með Sjálfstæðisflokknum í borginni að undanförnu, sem ný könnun Gallup endurspegli.

Hún segir stóran hluta borgargbúa vilja fá Sjálfstæðisflokkinn aftur í forystu og hún kveðst vera „klár í verkefnið.“

Viðskiptablaðið birti í kvöld könnun sem Gallup framkvæmdi þar sem fram kom að þriðji hver borgarbúi myndi kjósa Sjálfstæðisflokkinn ef kosningar færu fram í dag og að meirihlutinn væri fallinn.

„Við höfum skynjað mikinn meðbyr á síðustu mánuðum, það hefur verið jákvæður stígandi í könnunum og við auðvitað gríðarlega þakklát fyrir stuðninginn. Málflutningur okkar á greinilega góðan hljómgrunn hjá borgarbúum,“ segir Hildur í samtali við mbl.is.

Segir mikla óánægju með meirihlutann

Í lok febrúar mynduðu Samfylkingin, Píratar, Sósíalistar, Flokkur fólksins og Vinstri græn nýjan meirihluta. Samkvæmt könnuninni fengju flokkarnir aðeins 10 borgarfulltrúa kjörna en 12 menn þarf til að mynda meirihluta.

Hildur telur að hluti af fylgisaukningunni megi rekja til óánægju borgarbúa með nýjan meirihluta í borginni.

„Í könnuninni birtist þetta skýra ákall um breytingar, meirihlutinn fellur og verkleysið og vandræðagangurinn blasir við öllum. Það er ljóst að stærstur hluti borgarbúa vill að Sjálfstæðisflokkurinn taki aftur forystu í borginni. Ég er klár í verkefnið,“ segir hún.

Telurðu að það hafi ekki orðið breytingar með nýjum meirihluta sem var myndaður í febrúar?

„Nei, það tel ég nú ekki. Við erum sjá fimm flokka vinstrimeirihluta taka við af öðrum nokkuð vinstrisinnuðum meirihluta. Ég get ekki séð að það hafi orðið nein stórkostleg breyting enn sem komið er,“ svarar Hildur.

Kosningabaráttan hafin

Á þessu ári hafa verið birtar tvær kannanir um fylgi flokkanna í Reykjavíkurborg og umræða um borgarmálin mikið verið í brennidepli.

Kosningar fara fram í maí á næsta ári en Hildur var engu að síður spurð hvort að hún teldi að kosningabaráttan væri í raun hafin.

„Já, ég myndi segja að kosningabaráttan væri í raun hafin og maður finnur það á fólki að það er farið að lengja eftir því að geta kosið hér upp á nýtt.“