„Það var aldrei verið að leyna nokkrum sköpuðum hlut“

Sæki samantekt...

„Það er algjörlega á hreinu að ef einhver sérfræðingur hefði lagt áherslu á það eða lagt það til að við myndum fara með þetta í þingið þá hefðum við að sjálfsögðu gert það.“ Þetta segir Guðlaugur Þór Þórðarson, þingmaður Sjálfstæðisflokksins og fyrrverandi utanríkisráðherra, um viðbót við varnarsamninginn við Bandaríkin frá 2017. Viðbótin var undirrituð í tíð Guðlaugs Þórs sem utanríkisráðherra.

Þú segir að ef einhver sérfræðingur hefði lagt það til að þetta yrði borið undir þingið þá hefðir þú gert það. Slík uppástunga, var hún nauðsynleg, hefðir þú ekki bara átt að taka ákvörðun sem ráðherra um að kynna þetta fyrir þinginu?

„Ég man nú bara ekki eftir þessu máli yfir höfuð. Það er náttúrlega mjög mikið af framkvæmdaratriðum sem eru framkvæmd í ráðuneytinu án þess að þau komi á borð ráðherra. Aðalatriðið er þetta: Það var öllum ljóst hvað við vorum að gera þegar kom að varnarmálum og samskiptum við Bandaríkin. Það var ekkert leyndarmál,“ segir Guðlaugur Þór.

Fjallað var um viðbótina við varnarsamninginn við Bandaríkin í Kveik í gærkvöldi. Svo virðist sem að í utanríkisráðuneytinu hafi á sínum tíma verið talið óþarfi að leggja samninginn fyrir Alþingi. Þeirri túlkun eru þjóðréttarfræðingar sem Kveikur ræddi við ósammála. Í viðbótinni séu greinar sem feli í sér kvaðir sem, að mati þjóðréttarfræðinganna, þurfi samþykki Alþingis.

Guðlaugur segir að hann hafi ekki kynnt sér umfjöllun Kveiks til hlítar.

„Miðað við það sem ég sé á netinu, þá eru mín viðbrögð einfaldlega þessi: Það var aldrei verið að leyna nokkrum sköpuðum hlut. Það lá alveg fyrir að við lögðum mikla áherslu á varnarmálin,“ segir Guðlaugur Þór Þórðarson.