Ásthildur Lóa fékk algjöra sérmeðferð hjá bankanum

Sæki samantekt...

Lögmennirnir Árni Helgason og Sigurður G. Guðjónsson eru sammála um að sú meðferð sem Ásthildur Lóa Þórsdóttir og eiginmaður hennar fengu hjá viðskiptabanka sínum í kjölfar hrunsins sé einsdæmi.

Upplýsingar dúkkuðu upp

Þetta kemur fram í nýjasta þætti Spursmála. Þar eru til umræðu upplýsingar sem dúkkuðu upp í dómsmáli sem Ásthildur Lóa og maður hennar höfðuðu gegn sýslumanni vegna meints tjóns sem þau töldu sig hafa orðið fyrir vegna framgöngu embættisins í tengslum við nauðungarsölu á húseign þeirra.

Keyptu húsið á 12 ára gömlu verði

Húseignin er í dag í eigu þeirra eftir að þau keyptu hana aftur af Arion banka, stofnuninni sem leyst hafði fasteignina til sín. Í fyrrnefndu dómsmáli var upplýst að þau hefðu árið 2019 keypt húseignina af bankanum á 55 milljónir króna, eða sömu fjárhæð og þau höfðu greitt fyrir hana 12 árum fyrr, eða árið 2007.

Nefnir Árni að samkvæmt fyrirliggjandi upplýsingum um fasteignamarkaðinn á árinu 2019 að húsnæðið sem Ásthildur Lóa keypti hafi í raun verið tugum milljóna verðmætara en sem nam kaupveðrinu.

Bankar með ákveðnar verklagsreglur

Árni útskýrir í þættinum hvernig bankar hafi ákveðnar reglur um það hvernig þeir meðhöndla fullnustueignir. Hann segist ekki þekkja eitt einasta dæmi um það að fólk hafi fengið að leysa til sín eignir á eldgömlu verði.

Segir hann raunar að hann hafi aldrei haft hugmyndaflug til þess að þrýsta á fjármálastofnanir um að ganga til viðlíka samninga fyrir hans skjólstæðinga.

Enn fremur nefnir hann að sú meðferð sem Ásthildur Lóa virðist hafa notið af hálfu Arion banka sé í miklu ósamræmi við orðræðu sem hún hefur árum saman haft uppi sem formaður Hagsmunasamtaka heimilanna.

Þá hafi steininn í raun tekið úr þegar hún lýsti fullkomnu frati á íslensku dómskerfi eftir að dómari gerði ekkert úr fullyrðingum hennar í fyrrnefndu máli um að hún hefði verið hlunnfarin vegna framgöngu sýslumanns.

Viðtalið við þá Árna Helgason og Sigurð G. Guðjónsson má sjá og heyra í heild sinni í spilaranum hér að neðan: