Loftárásir Ísraela algjörlega óviðunandi og hernaðurinn á Gaza „ber öll einkenni þjóðarmorðs“

Sæki samantekt...

Ísraelsher drap yfir 400 Palestinumenn í loftárásum á Gaza aðfaranótt þriðjudags, þar á meðal fjölda almennra borgara, kvenna og barna. Hundruð særðust. Með árásunum gerðu Ísraelar endanlega út um vopnahléssamkomulagið við Hamas, sem þeir höfðu þegar þverbrotið síðustu sextán daga.

Það gerðu þeir með því að stöðva flutninga allrar mannúðaraðstoðar til Gaza þann annan mars, daginn sem annar hluti vopnahlésins átti að hefjast og mannúðaraðstoð til Gaza þar með að stóraukast, samkvæmt samkomulaginu sem þeir skrifuðu undir.

Ísraelar kenna engu að síður Hamas um og segja árásirnar hafa verið gerðar vegna þess að samtökin hafi þráast við að sleppa gíslum og hafnað tillögum um framlengingu vopnahlés. Hið rétta er að Hamas hefur sleppt öllum gíslum sem samið var um að láta lausa í fyrsta, sex vikna áfanga umsamins vopnahlés, en ekki þeim gíslum sem samið var um að veita frelsi í öðrum áfanga vopnahlésins, þar sem Ísraelar hafa neitað að hefja framkvæmd þess áfanga. Og viðræður um framhald vopnahlésins, sem hófust á ný í Dubaí í síðustu viku, virðast úr sögunni.

Þorgerður Katrín Gunnarsdóttir utanríkisráðherra segir þessar árásir hörmulegar og algjörlega óviðunandi. Brýnt sé að koma vopnahléi aftur á hið fyrsta og hefja flutninga á mannúðaraðstoð til Gaza. Hún segir íslensk stjórnvöld þegar hafa komið mótmælum á framfæri við Ísraelsstjórn, en telur það engum til góðs, heldur ekki Palestínumönnum, að Ísland síti stjórnmálasambandi við Ísrael. Það sé til þess eins fallið að draga úr möguleikum íslenskra stjórnvalda til að koma afstöðu sinni á framfæri við stjórnvöld í Ísrael.

Rætt var við Þorgerði Katrínu í Speglinum á þriðjudag, hlusta má á viðtalið í spilaranum hér að neðan.