Hviður gætu náð 40 metrum í lægð sem gengur hratt yfir

Sæki samantekt...

Kröpp lægð gengur yfir suðvestanvert landið eftir hádegi. Veðurstofan hefur gefið út gula viðvörun fyrir Suðurland, Faxaflóa, Breiðafjörð og Vestfirði vegna austan- og suðaustanhríðar.

Einar Sveinbjörnsson, veðurfræðingur Vegagerðarinnar, segir lægðina ekki mjög djúpa og hún fari hratt yfir.

„Það hvessir af suðaustri og austri á undan henni og verður dálítið hvasst í tvo klukkutíma eða svo. Við höfum nú verið að vara við því að það geti orðið hviður allt að 40 metrum á sekúndu, einkum undir Hafnarfjalli og þá þvert á veginn og síðan líka utanverðu Kjalarnes. Það er þá svona í kringum þrjúleytið, þrjú til fjögur, sem það verður verst.“

Snjóar á Hellisheiði og í Þrengslum

Um tíma snjóar á Hellisheiði og í Þrengslum en Einar segir að það standi stutt yfir, síðan hlánar. Hvasst verður austur með suðurströndinni á meðan veðrið gengur yfir.

„Það hjálpar okkur kannski að þessu sinni hvað þetta fer hratt yfir, hvað það rýkur fljótt upp og gengur jafnharðan niður aftur. Svo er suðvestanátt í kjölfarið og það má reikna með því að það verði dálítið blint og erfitt um Holtaverðuheiðina í fyrramálið. Þó að veðrið hafi verið alveg ágætt síðustu vikurnar þá er ekki alveg komið vor enn þá. Það eimir enn af vetri.“