Endurgreiðslur aflagjalda gætu gert hafnarsjóð Vesturbyggðar óstarfhæfan

Sæki samantekt...

Enn er mikil óvissa um hvort eldisfyrirtæki í Vesturbyggð muni fara fram á endurgreiðslu aflagjalda eftir að Landsréttur dæmdi innheimtu þeirra ólögmæta. Bæjarstjóri Vesturbyggðar segir að fari svo að Arnarlax krefjist endurgreiðslu á gjöldunum gæti hafnarsjóður sveitarfélagsins orðið órekstrarhæfur.

„Þau eru algjör forsenda þess að það sé hægt að halda úti starfsemi á höfnum hjá okkur,“ segir Gerður Björk Sveinsdóttir, bæjarstjóri Vesturbyggðar. Um háar fjárhæðir sé að ræða sem séu stór hluti af tekjum hafnanna.

Björn Hembre, framkvæmdastjóri Arnarlax. Arnarlax/Björn Hembre

„Enda er sjókvíaeldi stór hluti af atvinnustarfsemi hafna Vesturbyggðar,“ segir hún.

Björn Hembre framkvæmdastjóri Arnarlax sagði í samtali við fréttastofu að ekki hefði verið tekin ákvörðun um hvort krefjast ætti endurgreiðslu eða ekki. Þörf væri á góðu samtali við Vesturbyggð áður en sú ákvörðun væri tekin.

Gerður Björk segir að frekara samtal standi til á milli eldisfyrirtækjanna og sveitarfélagsins.

„Við höfum verið í samtali og það er búið að óska eftir fundi sem er þá gert ráð fyrir að verði eftir rúma viku,“ segir hún.

Engin svör frá stjórnvöldum

Gerður Björk segir að einnig hafi verið beðið um fund með stjórnvöldum um málið — bæði með Hönnu Katrínu Friðriksson atvinnuvegaráðherra og Eyjólfi Ármannssyni samgöngu- og sveitarstjórnarráðherra. Það hafi þó ekki gengið eftir þrátt fyrir ítrekaðar óskir.

Í frétt á vef Vesturbyggðar segir að samkvæmt þeim lagaramma sem höfnum er settur sé innheimta aflagjalda eina færa leiðin til þess að innheimta gjöld af þeim eldisfiski sem fer um hafnirnar. Sveitarfélög hefðu ekki getað farið í uppbyggingu á hafnarmannvirkjum í kringum sjókvíaeldi ef þau hefðu ekki talið að það væri heimild til að taka þjónustugjöld af eldisfiski vegna afla úr sjókvíum líkt og vegna annars afla.

Frumvarp um lagareldi sem lagt var fram af Bjarkeyju Olsen Gunnarsdóttur, þáverandi matvælaráðherra, í apríl í fyrra náði ekki fram að ganga.